Quqyq qorǵaýshylar akademııasynda keıbir qyzmetkerler qaı esikten kiretininin bilmeıdi- Merzadınov

ASTANA. QazAqparat - QR Bas prokýratýrasy janyndaǵy Quqyq qorǵaý organdary akademııasynyń rektory Erǵalı Merzadınov atalǵan oqý ornynyń kemshin tustaryn aıtty. Aıta ketken jón, akademııada barlyq quqyq qorǵaýshylar óz bilimderin shyńdaı alady. Jaqynda E.Merzadınov akademııanyń jańa rektory bolyp taǵaıyndalǵan bolatyn, dep xabarlaıdy QazAqparat tilshisi.

«Akademııada oqý baǵdarlamalary praktıkamen múldem úılespeıdi. Іshinde teorııadan basqa eshteńe joq. Men ózim naqty mysaldarǵa negizdelgen oqý baǵdarlamasyn kórgen emespin. Ashyǵyn aıtý kerek, kóbisi akademııaǵa eshbir daıyndyqsyz keledi. Keı kezde adamnyń jumys istep júrgen salasy oqý baǵdarlamasymen sáıkespeıdi. Demek, akademııaǵa bos júrgen qyzmetkerdi jibere salady», - dedi E.Merzadınov búgin Bas prokýratýranyń alqa májilisinde.

Onyń aıtýynsha, akademııa qyzmetkerleriniń kásibı daıyndyǵyn jan-jaqty tekserip shyǵý qajet. Sebebi mamandardyń aýysýy jıilep ketti. Úsh jyldyń ishinde atalǵan kórsetkish 60 protsentti qurady.

«Eńbek tártibi osal. Árbir ekinshi qyzmetker «bolnıchnyıda» júrdi. Al keıbir qyzmetkerler bir jylda eki ret emes, 8-10 ret «aýyryp» shyǵady. Bunyń barlyǵy kúndelikti nársege aınaldy. Sosyn akademııada úsh jyl istese, kiretin esikti de bilmeıtin qyzmetkerler bar», - dep atap kórsetti E.Merzadınov.

Bul rette Bas prokýror Qaırat Qojamjarov akademııanyń jaǵdaıyna baılanysty óziniń pikirin aıtty.

«Maǵan keletin qyzmetkerlerdiń kóbisi akademııaǵa aýystyrýdy suraıdy. Sodan qatty kúdiktene bastadym. Árıne, adam kóp talap qoıylmaıtyn jerge barǵysy keledi. Sosyn ol jaqta jalaqy jaqsy. Eńbek ótilin de jaqsy sanaıdy. Sondyqtan búgingi másele der kezinde kóterilip otyr», - dedi Q.Qojamjarov.