Qubyr tesilip, munaı tógilgen: Qyzylordada tabıǵatty lastaǵandar jazalandy

QYZYLORDA. KAZINFORM — Qyzylordada jer qoınaýyn paıdalanýshylardyń tabıǵatty lastaýy tyıylmaı tur. Ózekti másele «Amanat» partııasy oblystyq fılıaly janyndaǵy ekologııalyq keńes otyrysynda kóterildi.

Jıynda oblystyq ekologııa departamenti basshysynyń orynbasary Almas Ysqaqov baıandama jasady. Basqarma ókiliniń sózine súıensek, óńirde munaı salasyna mamandanǵan 13 kásiporyn bar. Mamandar bıyl 5 aıda olardyń qyzmetine 3 ret profılaktıkalyq baqylaý júrgizgen.

— Nátıjesinde 12 zańbuzýshylyq anyqtalyp, tıisti nusqamalar berildi. Atap aıtqanda, Torǵaı Petroleým, Qýatamlonmunaı, Qor kompanııalaryna tıesili munaı qubyry tesilip, munaı ónimi tógilgen. Bul apattyq jaǵdaıǵa ákep soǵyp, jer bederi lastanǵan. Departament tabıǵatty búldirgen sýbektilerge qatysty tıisti sharalar qabyldap, lastanǵan jer tolyǵymen qaıta qalpyna keltirildi, — dedi Almas Ysqaqov.

Atalǵan kásiporyndardyń 2-i — Torǵaı Petroleým men Qýatamlonmunaı ótken jyly da osylaı tabıǵatqa zııan keltirgen. Byltyr departament 8 profılaktıkalyq baqylaý, jospardan tys 5 tekserý júrgizip, 19 zańbuzýshylyqty anyqtaǵan.

Al jýyrda QazaqGazAimaq AQ Qyzylorda óndiristik fılıalyna tabıǵı monopolııalar týraly zańnama talabyn buzǵany úshin qosymsha 18,3 mln teńge kóleminde ákimshilik jaza qoldanyldy.