Kýbıkten qurastyrylǵan Tý, vıktorına, kontsert – Astanada Rámizder kúni qalaı toılanyp jatyr
ASTANA. KAZINFORM – Memlekettik rámizder kúnine oraı elordada «Meniń baıraǵym» merekelik is-sharasy ótti. Onda eriktiler turǵyndarǵa memlekettik rámizder týraly vıktorınalyq suraqtar qoıyp, estelik syılyqtar tabystady. Kópqabatty úıler terezesine 300-ge jýyq Tý ilindi. Sondaı-aq úsh myń Rýbık tekshelerinen alyp Tý beınesi jasaldy.
Astana qalasy Tilderdi damytý jáne arhıv isi basqarmasynyń basshysy Sáken Esirkeptiń aıtýynsha, qala kóleminde – bilim berý, densaýlyq saqtaý jáne memlekettik mekemelerde rámizderge baılanysty 400-ge jýyq is-shara ótip jatyr. Saǵat 11.00-de qaladaǵy barlyq memlekettik, kvazımemlekettik mekemelerde ujym bolyp, Ánuran aıtylyp, áleýmettik jelige jarııalanǵan. Al búgin keshke Báıterek monýmenti mańynda «Dombyra party» ótedi.
− Ózderińiz bilesizder, buǵan deıin rámizderimizge qatysty talaptar qatańdaý bolatyn. Kez kelgen azamat Týdy óz balkonyna ilgende máseleler týyndaıtyn. Biraq sońǵy eki jylda Memleket basshysy memlekettik Týdy, rámizderdi keńinen paıdalaný kerek, el azamattarynyń patrıottyq sezimin erkin bildirýine múmkindik syılaý kerek degen bolatyn. Búgin qalamyzdyń iri dańǵyldary men kóshelerinde úı qasbetteri men balkondaryna Memlekettik Tý ilinip jatyr. Qala kóshelerine 1,5 myń kók jalaýsha ilindi. Sondyqtan árqashan Týymyz tórimizde bolsyn, úıimizde, júrgen jerimizde týymyzdy nasıhattap, kóterip júreıik, − dedi Sáken Esirkep tilshilerge bergen suhbatynda.
Basqarma basshysy memlekettik tildi damytýǵa, memlekettik rámizderdi nasıhattaýǵa qatysty barlyq azamattyq bastamany qoldaıtynyn atap ótti. Osylaısha, Qazaqstanda alǵash ret aýqymdy spıdkýbıng shoýy uıymdastyryldy. Jas sheberler úsh myń Rýbık kýbıginen Qazaqstan Respýblıkasynyń Memlekettik Týynyń aýqymdy beınesin qurastyrdy.
– Qala ákimdigi bizdiń portfolıomyzdy kórip, osy is-sharaǵa arnaıy shaqyrdy. Eń aldymen arnaıy kompıýterlik baǵdarlama kómegimen Týdyń eskızin jasap alamyz, ony bólimder men pıkselderge bólemiz. Nátıjesinde bıiktigi 3 metrge jetetin, kýbıkterden qurastyrylǵan alyp Tý beınesi shyǵady. Munda 2 tús qana bolǵandyqtan, shamamen 5 saǵat ýaqytymyz jumsalady. Keshe Eltańbany 10 saǵat qurastyrǵan edik. Sebebi onda tús kóp, altyn tústi shyǵarý úshin sary men sarǵysh tústerdi aralastyrý kerek boldy. Turǵyndar úlken tańdanyspen qaraıdy, kýbıkten jasalǵanyna senbeı, foto-vıdeoǵa túsirip jatyr. Buryn-sońdy qoǵamdyq oryndarda mundaı is-shara bolmaǵan, − deıdi Kazakhstan Speedcubing Federation uıymynyń jetekshisi Álıhan Ertursyn.
Bul rette turǵyndarǵa jalaýsha taratqanda onyń saqtalýy men qoldaný talaptary da qosa túsindiriledi.
– Ony jerge tastamaý kerektigin, tórge ilip qoıýdy aıtamyz. Memlekettik Tý – Táýelsizdigimizdiń nyshany ǵoı. Memleket basshysy qandaı da bir elge barsa, birinshi Týymyz kóterilip, Ánuranymyz aıtylady. Sportshylarymyz jeńiske jetse, Osyndaı baǵyttaǵy jumystardy patrıottyq aktsııa aıasynda da túsindirip ótemiz, − dedi Sáken Esirkep.
