QTJ jolaýshylarǵa vokzalǵa erterek kelýge úndedi

NUR-SULTAN. QazAqparat – «QTJ» UK» AQ jolǵa shyǵýdan ázirge bas tartýǵa shaqyrady. Bul týraly «Qazaqstan temir joly» ulttyq kompanııasynyń basqarma tóraǵasynyń birinshi orynbasary Qanat Álmaǵambetov málim etti, dep habarlaıdy QazAqparat tilshisi.

«Qazirgi ahýaldy eskere otyryp, jergilikti jerlerdegi poıyz jáne vokzal bastyqtary, sondaı-aq temirjoldaǵy ózge de qyzmetkerler túsindirý jumystaryn júrgizip jatyr. «QTJ» UK» AQ jolǵa shyǵýdan ázirge bas tartýǵa shaqyrady jáne qabyldanǵan qaýipsizdik sharalaryna túsinistikpen qaraýǵa suraıdy», - dedi Q. Álmaǵambetov Ortalyq kommýnıkatsııalar qyzmetinde.

Sonymen qatar ol keste boıynsha júrmeı qalǵan poıyzdardyń jolaýshylaryna bılet quny tolyq qaıtarylatynyn eske saldy.

«Barlyq óńirde tótenshe jaǵdaı rejıminiń engizilýine baılanysty ákimdiktermen birlese bul kezeńdegi jumystyń tehnologııasyn pysyqtadyq. Qazirgi ýaqytta túngi kezdegi qyzmetke qatysty eshqandaı shaǵym bolmady. Osy oraıda jolaýshylar ózderimen birge jol júrý bıleti men jeke kýáligin alyp júrýi kerek. Vokzaldarǵa jolaýshylar múmkindiginshe erterek kelgenderi abzal. Vokzaldar shtattyq rejımde jumys istep tur. Bizdiń temirjolshylar uıymdastyrylǵan deńgeıde qyzmet etip jatyr», - dedi Qanat Álmaǵambetov.

Budan buryn habarlanǵandaı, Qanat Álmaǵambetov elimizdiń aýmaǵyndaǵy poıyzdar qozǵalysyna túsinikteme berdi. QTJ jedel shtaby Kólik komıtetiniń kelisimimen 25 jolaýshy poıyzynyń qozǵalysy toqtatylyp, 13 poıyz qosyndarǵa qaıtaryldy.

Sonymen qatar el aýmaǵynda 120-ǵa jýyq júk poıyzy ýaqytsha toqtatyldy.