«Kremlde kindigi kesilgen qazaq» - baspasózge sholý
***
Osy ýaqytqa deıin telearnalarda júrgen túrli-túrli telehıkaıalar men onyń taptaýryn oqıǵalary kórermenderdiń kóńilin kónshitip turǵan joq. Bitpeıtin de qoımaıtyn úndi serıaldary, bolmysymyzǵa kele bermeıtin batystyq kartınalardyń jaıy kóp aıtylyp júr. Endigi jerde kınematograftarymyz otandyq telehıkaıalar sheteldik televızııalyq ónimdermen básekede oza shaýyp, naryqty jaýlap ala alatynyna senimdi. Muny da ýaqyt kórsete jatyr.
Degenmen, bul týraly apta basynda Almatyda ótken «Ómir synaǵy» jáne «Shalǵaıdaǵy oqıǵa» telehıkaıalarynyń tanystyrylymy barysynda aıtyldy. Bul eki joba - qazirgi tańdaǵy ózekti áleýmettik máselelerge arnalǵan. Biri múmkindigi shekteýli adamdardyń qoǵamdaǵy orny men quqyqtary taqyrybyn qozǵasa, ekinshisi - quldyrap bara jatqan aýyl taǵdyryna alańdaıdy.
Jobalardyń bas prodıýseri Danııar Janbekovtiń aıtýynsha, qazirgi ýaqytta memleket pen kommertsııalyq arnalar yntymaqtastyq ornatyp, birlesken jobalar jasaýdy qolǵa ala bastaǵan. Atalǵan eki joba osyndaı qadamnyń alǵashqy nátıjesi bolyp otyr. Atap aıtqanda, Qazaqstan Respýblıkasy Investıtsııalar jáne damý mınıstrligi Baılanys, aqparattandyrý jáne aqparat komıtetiniń qoldaýymen túsirilgen.
«Ómir synaǵy» - múgedekter arbasyna tańylǵan Dana esimdi keıipkerdiń taǵdyryn sýretteıdi. Sulý, jas kelinshektiń óz aıaǵymen jer basyp júre almaı qalǵannan keıingi ómiri, azap pen kúreske toly taǵdyry sıpattalady. Adamnyń erik-jigerin madaqtaıtyn sıýjet jelisi kúrdeli. Osy jaıynda tolyq bilgińiz kelse, «Egemen Qazaqstan» gazetinen «Ózgeniń ómiri» atty maqalany oqyp shyǵyńyz.
Bas basylymda «Kremlde kindigi kesilgen» degen maqala kópshilik nazaryna usynylyp otyr. «Estimegen elde kóp» degen ras-aý. Siz Iosıf Stalınniń kabınetinde tolǵatyp, Kremlde bosanǵan qazaq áıeli týraly estidińiz be? Estimeseńiz, bizdiń búgingi aıtpaǵymyz - Kremlde kindigi kesilgen Qaısar Meńisov degen qazaqtyń ómirtarıhyna qatysty hıkaıat bolmaq»,-dep jazady gazet. Bul maqalada Q.Meńisovtiń ákesi Nurjan Meńisuly men anasy Danııanyń basynan ótkergen oqıǵa keńinen baıandalady.
***
«Aıqyn» gazetiniń jazýynsha, Dúnıejúzilik bank mekemeleriniń biri - Halyqaralyq qaıta qurý jáne damý banki otandyq ǵalymdardyń eńbegin kommertsııalandyrýǵa qaryz beretin boldy. Bul jóninde Senattyń Áleýmettik-mádenı damý jáne ǵylym jónindegi komıtetiniń otyrysynda Bilim jáne ǵylym vıtse-mınıstr Takır Balyqbaev málimdedi. Komıtet otyrysynda «Halyqaralyq qaıta qurý jáne damý banki men Qazaqstan Respýblıkasy arasyndaǵy qaryz týraly kelisimdi ratıfıkatsııalaý týraly zań jobasy talqylandy. Atalǵan zań jobasy elimizdegi ǵalymdardyń ǵylymı, ǵylymı-tehnologııalyq nátıjelerin kommertsııalandyrýǵa, óndiriske engizýge baǵyttalǵan jobalardy júzege asyrýdy qarastyrady.
- Jobaǵa Dúnıejúzilik bank tarapynan 31 mlrd. teńge qarajat bólinedi jáne joba 5 jyl boıy júzege asyrylatyn bolady. Ǵalymdardyń ǵylymı eńbekterin kommertsııalandyrý, óndiriste qoldanysqa engizý, olarǵa granttar bólý basty mindet bolyp tabylady. Bul maqsatqa jalpy somadan 14 mlrd teńgeden astam qarjy qarastyryldy, - dedi Bilim jáne ǵylym vıtse-mınıstri Takır Balyqbaev.
Vıtse-mınıstrdiń aıtýynsha, sonyń ishinde, 10 mlrd. teńgeden astam qarajat kommertsııalandyrýǵa arnalǵan granttarǵa bólinse, 13 mlrd. teńgeden astam qarjy ǵalymdardyń áleýetin arttyrýǵa jumsalmaq. Osy jaıynda «Otandyq ǵalymdardyń eńbegi baǵalanady» atty maqalada tolyq berilgen.
Osy basylymda «Alaıaqtar azaımaı tur» degen maqala berilgen. «Myńdaǵan qylmystyq isterdiń saraptamalyq statıstıkasyna júginsek, bizdiń azamattar alaıaqtar usynatyn aldaýdyń on shaqty ǵana eń qarapaıym túrlerine senip, qaltasyndaǵy qarjysynan, qolyndaǵy múlkinen aıyrylyp qalady eken. Ekonomıkalyq daǵdarys kezderinde adamdy aldaý amaldarynyń san alýan túrleri shyǵady eken. Sondyqtan quqyq qorǵaý organdary aldaǵy ýaqytta alaıaqtardan saq bolýǵa shaqyrady. Ádette alaıaqtar adamnyń senimine kirip, jaman oıyn iske asyrý úshin óziniń daıyndaǵan «tuzaǵyn» zańdy formaǵa keltiredi. Kásipker retinde tirkeledi, qolhat beredi, kelisimshart jasaıdy..., - dep jazady gazet. - Jalǵa ofıs alyp ózin jarnamalaıdy, ádemi jazýlarmen ony bezendiredi, fırmasy týraly býkletter taratady... Bulardyń ishinde jyljymaıtyn múliktermen, jer telimderimen, shaǵyn bızneske kredıt rásimdeýmen, jumysqa ornalastyrýmen aınalysatyn alaıaqtardyń «jumystary» júrip tur dep aıtýǵa bolady".
