«Kreatıv hab» qory qurylady
«Kreatıv hab» halyqaralyq kreatıvti ındýstrııa qory qurylady. Bul jaıynda Premer-Mınıstr Álıhan Smaıylovtyń Senat depýtattarynyń saýalyna jaýabynda aıtylǵan, dep habarlaıdy Kazinform.
«Memleket basshysy osy jyly 1 qyrkúıektegi Joldaýynda árbir oblys ortalyǵynda jáne iri qalada kreatıvti ındýstrııa ortalyqtaryn qurýdy, sondaı-aq qatysýshylarǵa óz ónimderin kommertsııalandyrý máselelerinde kómek kórsetýdi qamtıtyn kreatıvti ındýstrııany qoldaý sharalarynyń jeke toptamasyn ázirleý mindetin qoıdy. Osy oraıda «Qazaqstan Respýblıkasynyń keıbir zańnamalyq aktilerine kreatıvti ındýstrııalardy qoldaý máseleleri boıynsha ózgerister men tolyqtyrýlar engizý týraly» QR zańynyń jobasy ázirlenýde», - dedi Úkimet basshysy jaýabynda.
Onyń atap ótýinshe, zań jobasy aıasynda:
- «Kreatıv hab» halyqaralyq kreatıvti ındýstrııa qorynyń (budan ári – Qor) mártebesin, fýnktsııalaryn, qyzmet baǵyttaryn, qarjylyq jáne materıaldyq-tehnıkalyq ınfraqurylymyn bekitý;
- oblystyń, respýblıkalyq mańyzy bar qalanyń jáne astananyń jergilikti atqarýshy organynyń quzyretin aıqyndaý;
- Qordyń qyzmetin júzege asyrý úshin sheteldikterdi tartýǵa arnalǵan kvotany zańnamalyq deńgeıde bekitý;
- biryńǵaı operatordyń «Sátti Juldyz» AQ ulttyq lotereıasynyń tabysynan 3 paıyz mólsherinde Qorǵa aýdarý jónindegi normany zańnamalyq turǵydan bekitý;
- erekshe salyq rejımin qoldaný maqsatynda Salyq kodeksine ózgerister engizý jáne basqa da normalar kózdelgen.
«Zańnamalyq ózgerister men tolyqtyrýlar arqyly kreatıvti ındýstrııalar salasyn damytý jastardy, shyǵarmashylyq ujymdardy, mádenıet salasynyń ókilderin osy salaǵa tartý arqyly kásipkerlikti damytýǵa oń áser etýge múmkindik beredi», - dedi Álıhan Smaıylov.
