QR Joǵarǵy soty «Kompanııa Munaı Ekologııa» JShS fılıalynyń burynǵy basshylaryna qatysty jazany jeńildetti

ASTANA. 5 aqpan. QazAqparat - Búgin QR Joǵarǵy Sotynyń qylmystyq ister jónindegi qadaǵalaý alqasy Dýman Áripbaev men Ónerbek Álshimbaevqa qatysty júrgizilgen sot aktisin qaıtadan qarady.

Joǵarǵy sottyń baspasóz qyzmetinen habarlanǵandaı, qylmystyq isti qaraǵan qadaǵalaý alqasy óz qaýlysymen Mańǵystaý oblysy Jańaózen qalalyq sotynyń 2012 jylǵy 24 mamyrdaǵy úkimin, Mańǵystaý oblystyq soty apellıatsııalyq sot alqasynyń 2012 jylǵy 12 shildedegi qaýlysyn jáne Mańǵystaý oblystyq soty kassatsııalyq sot alqasynyń 2012 jylǵy 29 tamyzdaǵy qaýlysyn ózgertti. Sol arqyly sottalǵan D.Áripbaev pen Ó.Álshimbeavtyń qylmystyq áreketteri QR QK-niń (bótenniń múlkin ıelenýge jaǵdaı týǵyzýǵa nemese senip tapsyrylǵan múlikti iri mólsherde talan-tarajǵa salý), boıynsha:

D.Áripbaevqa 5 jylǵa bas bostandyǵynan aıyryp, dúnıe múlkin tárkileýge, 3 jyl boıy kásipkerlik qyzmette materıaldyq jaýapkershiligi joǵary basshylyq qyzmette isteý quqyǵyn shekteýge, jazasyn jalpy rejımdegi túzeý mekemesinde óteýge;

Ó.Álshimbaevqa QR QK 63 babyn qoldana otyryp shartty túrde 5 jylǵa bas bostandyǵynan aıyryp, 2 jylǵa synaq merzimin belgileýge jaza taǵaıyndaldy. Ó.Álshimbaevty qamaýdan birden sot zalynan bosatýǵa qaýly shyǵaryldy.

QR Joǵarǵy Sotynyń qadaǵalaý alqasy barlyq jaǵdaılardy eskere kelip: qylmystyq áreketi arqyly keltirilgen naqty zııan mólsheriniń tómendigin, densaýlyq jaǵdaıyn, otbasylyq jaǵdaıy men minezdemesiniń jaqsy ekendigin eskere otyryp Ó.Álshimbaevqa shartty túrde jaza taǵaıyndady.