QR SІM: Qazaqstan koreıaralyq joǵary deńgeıdegi kelissózderdi qoldaıdy

ASTANA. QazAqparat - Qazaqstan Respýblıkasy 2018 jyldyń 9 qańtarda ótken Koreıa Respýblıkasy men Koreıa Halyq Demokratııalyq Respýblıkasy arasyndaǵy joǵary deńgeıdegi kelissózderdi quptaıdy jáne ekijaqty qarym-qatynastardy jaqsartý úshin eki eldiń kúsh-jigerin joǵary baǵalaıdy. QR Syrtqy ister mınıstrliginiń baspasóz qyzmeti osyndaı málimdeme taratty.

«Bul kezdesý men Soltústik Koreıanyń Phenchhanda ótetin XXIII Qysqy Olımpıada oıyndaryna qatysýy tolyqqandy koreıaralyq dıalogtyń qaıta jańarýyna bastaý bolyp, Koreı túbegindegi shıelenisti jeńildetýge járdemdesedi dep úmittenemiz. Koreıa Respýblıkasy men Soltústik Koreıa arasyndaǵy belsendi dıalog Koreı túbeginiń denýklearızatsııa máselesine oń áserin tıgizetin bolady degen senimdemiz»,-delingen málimdemede.

Sonymen qatar onda Qazaqstan Koreı túbegindegi jaǵdaıdyń dıalog pen kelissózder arqyly rettelýin dáıekti qoldaıtyndyǵy aıtylǵan.

«BUU Qaýipsizdik Keńesiniń tóraǵasy, sondaı-aq óz erkimen ıadrolyq qarýdan bas tartqan memleket retinde Qazaqstan barlyq múddeli taraptardy Soltústik Koreıanyń ıadrolyq jáne ballıstıkalyq baǵdarlamalary boıynsha kelissózder úderisin jedel qaıta qozǵaýǵa shaqyrady»-delinedi habarlamada.