QR Prezıdenttigine kandıdattar arasyndaǵy teledebat qandaı formatta ótedi

NUR-SULTAN. QazAqparat - QR Prezıdenttigine kandıdattar arasyndaǵy televızııalyq pikirtalas tikeleı efır ne jazbasha ótetindigi aldaǵy ýaqytta anyqtalady. Bul týraly búgin «Habar» agenttigi basqarmasy tóraǵasynyń birinshi orynbasary Rınat Kertaev aıtty, dep habarlaıdy QazAqparat tilshisi.

«Televızııalyq pikirtalas pen pikirsaıys tikeleı efır nemese jazbasha ótetindigi dál qazirgi ýaqytta talqylanýda. Men qazir osy jınalystan shyǵyp, osy pikirtalas pen pikirsaıysty ótkizetin jumys tobynyń otyrysyna baramyn. Sol jerde talqylanady. Sodan keıin biz pikirtalas pen pikirsaıysqa deıin buǵan qatysty pikirimizdi bildiretin bolamyz», - dedi ol Ortalyq saılaý komıssııasynda ótken brıfıngte.

Osy rette Rınat Kertaev «Habar» agenttiginiń kóptegen halyqaralyq sharany, qoǵamdyq-saıası sharalardy ótkizýde mol tájirıbesi bar ekenin aıtty.

«Sonymen qatar osyǵan deıin elimizdiń tarıhynda bolǵan birneshe pikirtalasty ótkizdi. Atalǵan sharalarǵa qatysqan tájirıbeli, kásibı mamandarymyz da bar. Sol mamandarmen aqyldasa kele tıimdi usynys beremiz», - dedi ol.

Aıta keteıik, búgin QR OSK Qazaqstan Prezıdentiniń kezekten tys saılaýynda saılaý aldyndaǵy pikirtalastar men pikirsaıystar ótkizý týraly qaýlyny qabylady. Oǵan sáıkes televızııalyq pikirtalastar men pikirsaıystar 2019 jylǵy 29 mamyrda Nur-Sultan qalasynda «Habar» agenttigi AQ-nyń televızııalyq arnasy efırinde kórsetiledi.