QR Prezıdenti saılaýy Konstıtýtsııa talaptarynyń saqtalýymen ótkizildi - QR Bas prokýratýrasy
«Elektoraldyq kezeńdegi qadaǵalaý qyzmetiniń nátıjesi Qazaqstan Respýblıkasy Prezıdentiniń kezekten tys saılaýy Qazaqstan Respýblıkasy Konstıtýtsııasynyń jáne «Qazaqstan Respýblıkasyndaǵy saılaý týraly» Konstıtýtsııalyq zańy talaptarynyń saqtalýymen ótkizildi dep tujyrymdaýǵa múmkindik beredi», delingen habarlamada.
Qazaqstan Respýblıkasynyń Bas prokýratýrasy Konstıtýtsııaǵa sáıkes bolyp ótken Qazaqstan Respýblıkasy Prezıdentiniń kezekten tys saılaýy barysynda zańdylyqty qamtamasyz etý boıynsha qajetti barlyq sharalardy qabyldady.
«Júrgizilgen qadaǵalaý is-sharalarymen saılaý komıssııalary nemese memlekettik organdar tarapynan qandaı da bir buzýshylyqtar anyqtalǵan joq», dep atap ótilgen habarlamada.
Saılaý naýqanynda prokýratýra organdaryna saılaýmen baılanysty nebári 4 ótinish tústi, olardyń 3-ýi zańnamany buzý faktileri týraly aqparat nemese shaǵymdardy qamtymaǵan. Eki ótinishte zańdardyń normalaryn túsindirý suranysy mazmundalǵan, úshinshisinde prezıdenttikke kandıdattarǵa zańnamamen qoıylǵan keıbir talaptarmen kelispeıtini aıtylǵan. Bul 3 ótinish quzyreti boıynsha Ortalyq saılaý komıssııasyna máni boıynsha qaraý úshin joldandy.
Sondaı-aq saılaý kúni Semeı qalasynyń prokýratýrasyna bir otbasy jubynyń aryzy kelip tústi, onda olar turǵylyqty jeri boıynsha ýchaskeniń saılaýshylar tiziminde bolmaýyna shaǵymdanǵan. Degenmen, olardyń tıisti aýmaqta turatyndyǵy rastalǵannan keıin olarǵa ózderiniń saılaýǵa qatysýǵa konstıtýtsııalyq quqyqtaryn júzege asyrý múmkindigi berildi.
«Daýys berý kúni qandaı da bir eleýli buzýshylyqtarsyz, tynysh jaǵdaıda ótkenin atap ótemiz. Daýys berý kúni qarsańyndaǵy kezeńde tek qana saılaý aldyndaǵy úgitti ótkizý, sondaı-aq qoǵamdyq pikirge suraý salý nátıjelerin jarııalaý sharttarynyń jekelegen buzýshylyqtary tirkelgen, olar boıynsha aldyn alý sıpatyndaǵy sharalar qoldanyldy», delingen habarlamada.
Mysaly, aǵymdaǵy jylǵy 30 naýryzda Almaty qalasynyń prokýratýrasy «Feısbýktegi» ózderiniń paraqshalarynda Qazaqstan Respýblıkasy Prezıdenttigine kandıdattardyń ar-namysy men qadir-qasıetine nuqsan keltiretin pikir aıtýǵa jol bergen eki azamatqa zańdy buzýǵa jol berilmeıtini týraly aldyn ala eskertý jarııalady. Saılaý zańnamasynyń buzýshylyq faktileri boıynsha ákimshilik jáne/nemese qylmystyq ister qozǵalǵan joq. Búkil elektoraldyq kezeńde Qazaqstan Respýblıkasynyń sottaryna saılaý protsesine qatysty 7 aryz tústi, olardyń 1-ýi keri qaıtaryldy, 3-ýi boıynsha qabyldaýdan bas tartyldy, 1-i qaraýsyz qaldyryldy jáne 1 shaǵym boıynsha ákimshilik óndiris toqtatyldy.
Máselen, aǵymdaǵy jylǵy 20 sáýirde S.Iteǵulov Oral qalasynyń mamandandyrylǵan ákimshilik sotyna onyń saılaýshylar tiziminde joq bolýyna shaǵymdandy jáne kináli tulǵalardy ákimshilik jaýapkershilikke tartýdy surady. Sot S.Iteǵulovtyń saılaýshylar tizimine qosylǵanyn anyqtady, al sotqa júginýge Call-ortalyqtyń operatorynan alynǵan aqparatty qate túsiný faktisi sebep bolǵan. 21 sáýirde ákimshilik óndiris quqyq buzýshylyq oqıǵasynyń bolmaýyna baılanysty toqtatyldy.
«Keltirilgen derekter, sondaı-aq saılaý zańnamasynyń buzýshylyqtary týraly qandaı da bir shaǵymdardyń bolmaýy ótken saılaý protsesiniń barynsha aıqyndyǵyn jáne zańdylyǵyn kórsetedi», dep túıindelgen QR Bas prokýratýrasynyń málimdemesinde.
Salystyrý úshin aıta ketsek, aldyńǵy prezıdenttik saılaý barysynda (2011 jylǵy sáýir) prokýratýra organdarynda 87 ótinish qaralǵan, anyqtalǵan buzýshylyqtar boıynsha 16 ákimshilik quqyq buzýshylyqtar týraly is qozǵalǵan, 2012 jylǵy qańtarda ótken parlamenttik saılaý barysynda prokýratýraǵa 536 aryz túsken, 76 prokýrorlyq qadaǵalaý aktileri engizilgen, 45 ákimshilik isterdiń qozǵalǵan.
