QR Prezıdenti Almaty oblysynyń basshylyǵyna vaktsınatsııany jedeldetýdi tapsyrdy

NUR-SULTAN. QazAqparat - Qasym-Jomart Toqaev «Dolce» kásipornyna bardy. Qazaqstan Prezıdentine kompanııanyń jumysy men shyǵaratyn ónimderi týraly málimet berildi, dep habarlaıdy QazAqparat Aqordanyń resmı saıtyna silteme jasap.

Kompanııa basshylyǵy «Dolce» kásipornynyń el naryǵynda 1998 jyldan beri jumys istep kele jatqanyn aıtty. 372 adam eńbek etip jatqan kásiporyn 160-tan astam ónim shyǵarady. Olardyń arasynda qazirgi ýaqytta asa qajet medıtsınalyq qolǵaptar, úsh jáne tórt qabatty betperdeler, halattar, dári-dármekter bar. Kompanııanyń jyldyq qarjy aınaly – 8,4 mlrd.teńge.

Memleket basshysyna oblystaǵy densaýlyq saqtaý salasynyń jaǵdaıy týraly baıandaldy.

Almaty oblysynda koronavırýsqa qarsy is-sharalar aıasynda qysqa merzimde 200 tósektik juqpaly aýrýlar aýrýhanasy salynyp, 180 jedel járdem kóligi jáne 12 jyljymaly medıtsınalyq keshen satyp alynǵan. Oblystyń 17 aýrýhanasy ottegi stantsııalarymen qamtamasyz etilip, tósek-oryndardyń 45 paıyzy oksıgenoterapııamen qamtylǵan. 17 kompıýterlik tomograf, 53 rentgen, 75 Haı Flý, 606 jeldetý apparattary jumys istep tur.

Sonymen qatar búginde oblys halqynyń 649 myń turǵyny ekpeniń І komponentin, 510 myńy II komponentin saldyrǵan. Bul oblys halqynyń 60 paıyzy vaktsınamen qamtylǵanyn kórsetedi.

Qasym-Jomart Toqaev oblys basshylyǵyna óńirdegi epıdemıologııalyq jaǵdaıdy únemi baqylaýda ustaýdy, vaktsına salý jumysyn jedeldetýdi tapsyrdy.