QR PІB Medortalyǵynyń neırohırýrgy Ózbekstanda kúrdeli operatsııa jasady
Bul týraly QazAqparat QR Prezıdentiniń Іs Basqarmasy baspasóz qyzmetine silteme jasap habarlaıdy.
Baspasóz qyzmetiniń málimetterine qaraǵanda, bir aı buryn Kentaý qalasy turǵynynyń mıyna qan quıylyp, mańdaı bóliginde isik paıda bolǵan. Sóıtip naýqasqa tez arada operatsııa jasalyp, isik alynǵan bolatyn. Alaıda otadan keıin onyń jaǵdaıy ońalmaı, qosymsha em alý úshin Tashkentke jetkizilgen. Ózbekstandyq mamandar kompıýterlik tomografııa angıografııasynyń nátıjesinde oǵan shuǵyl operatsııa jasaý kerektigin anyqtady.
Kóp uzamaı QR PІB Medıtsınalyq ortalyǵy aýrýhanasy dırektorynyń orynbasary, áıgili neırohırýrg Myńjylqy Berdiqojaev kórshi eldegi áriptesteriniń shaqyrýymen Tashkentke bardy. Ol naýqastyń emine qatysty ózbekstandyq áriptesterine konsýltatsııa berip, naýqasqa kúrdeli ota jasady.
Operatsııa sátti ótti. Qazirgi tańda naýqastyń jaǵdaıy birqalypty jáne ol tashkenttik dárigerlerdiń baqylaýynda.
«QR Prezıdentiniń Іs Basqarmasy Medıtsınalyq ortalyǵy men Tashkenttegi Respýblıkalyq shuǵyl medıtsına ortalyǵy arasynda buǵan deıin memorandým jasalǵanyn aıta keteıik. Sonyń aıasynda eki eldiń dárigerleri ózara tájirıbe almasyp, kúrdeli operatsııa jasap turady»,-delingen habarlamada.
Foto: udp-rk.kz