QR mýzeıleriniń 3 000-nan astam jádigerin qalpyna keltirgen, «Halyq qazynasynyń murageri» - B.Álibaıdyń jeke kórmesi Astana tórinde

ASTANA. QazAqparat - Erteń, 12 qarasha kúni Qazaqstan Respýblıkasy Tuńǵysh Prezıdenti Mýzeıinde belgili zerger, Halyqaralyq Karl Faberje Ordenniń ıegeri, QR Eńbek sińirgen qaıratkeri Berik Álibaıdyń «Halyq qazynasynyń murageri» atty jeke kórmesiniń ashylý rásimi ótedi. Kórme 15 jeltoqsanǵa deıin jalǵasady, dep habarlady Mýzeıdiń baspasóz qyzmetinen.

Zergerlik óner atadan mura bolyp qalǵan, balalyq shaǵynan halyqtyń ónerimen sýsyndaǵan Berik Álibaı 1964 jyly Jambyl oblysy, Merke aýdany, Qyzyl saı aýylynda dúnıege kelgen. N.V Gogol atyndaǵy Almaty kórkem óner ýchılışesin jáne T.K. Júrgenov atyndaǵy Qazaq Ulttyq óner Akademııasyn bitirdi. 1989 jyldan bastap kóptegen respýblıkalyq, búkilodaqtyq jáne halyqaralyq kórmeler men Qazaqstannyń shet memleketterdegi ótkizilgen mádenıet kúnderiniń belsendi qatysýshysy. Onyń shyǵarmashylyǵynyń biregeı úlgileri QHR-da, Saýd Arabııasynda, Japonııada, Iranda, Reseıde, Katarda, Túrkııada, Germanııada, Ispanııada, Oman Sultanatynda, Anglııa sııaqty memleketterde kórmelerge qoıyldy. Berik Álibaı Qazaqstan dızaınerleri Odaǵy jáne Qazaqstan sýretshiler Odaǵynyń múshesi, «QR Mádenıet qaıratkeri», QR Prezıdenti stependııasynyń ıegeri, «Qoldanbaly óner» nomınatsııasy boıynsha «Astana - Báıterek 2005» konkýrsynyń laýreaty, «Qazaqstan Respýblıkasynyń Táýelsizdigine 20 jyl» medalimen marapattaldy. 2013 jyly Sankt-Peterbýrg qalasynda Karl Faberje halyqaralyq memorıaldyq qorynyń «Eńbegi sińgen zerger» gaýhar tasty Ordenimen jáne 2014 jyly «Musylman áleminiń qurmetti zergeri» ordendik belgisimen marapattalǵan. Sheber qazaq halqynyń mádenıetiniń damýyna úlken úles qosty. Onyń qolynan Qazaqstan mýzeıleriniń 3 000-nan astam jádigerleri qalpyna keltirý, jóndeý jumystarynan ótti. Onyń avtorlyq jumystary «Táýelsizdik Saraıyndaǵy» etnografııa jáne qoldanbaly óner Galereıasynda, QR Tuńǵysh Prezıdentiniń Mýzeıi, QR Ortalyq Memlekettik mýzeıi men QR Ulttyq Mýzeıi qorlarynda sondaı-aq jeke kollektsıonerler men sheteldik galereıalarda saqtaýly. Qazirgi ýaqytta Berik Álibaı QR Ulttyq mýzeıinde Konservatsııalaý jáne qalpyna keltirý ortalyǵynyń Metall, aǵash, teri jáne súıek buıymdaryn restavratsııalaý bóliminiń jetekshisi bolyp qyzmet atqarady. Berik Álibaıdyń avtorlyq zergerlik jumystary eki kórme zaldaryna ornalasty. Onda qazaq batyrlarynyń qarý-jaraqtaryn, sondaı-aq dástúrli qazaq qoǵamyna tán handardyń bılik nyshany bolyp tabylatyn asataıaqtardy kórýge bolady. Qazaq qyzdarynyń áshekeı buıymdary: qos bilezikter, syrǵalar, boıtumarlar, óńirjıekter, júzikter kelgen qonaqtardy beı-jaı qaldyrmaıdy. Ekspozıtsııada kórsetilgen buıymdardyń barlyǵy kóbinese marjan, malahıt, laǵyl, aqyq syndy asyl tastarmen bezendirilgen, delingen habarlamada.