QR Memlekettik hatshysyna Aqtóbedegi jańa áleýmettik nysandar tanystyryldy
Aqtóbede memlekettik-jekemenshik seriktestik jáne bıznestiń áleýmettik jaýapkershiligi aıasynda bilim, densaýlyq saqtaý, mádenıet, sport nysandary boı kóterýde. Qazirgi ýaqytta 12 nysan qoldanysqa berilip, jumys istep tur. Solardyń biri - Shyǵarmashylyq akademııasy. Óner ordasyn «Qazhrom» TUK» AQ bıznestiń áleýmettik jaýapkershiligi aıasynda salyp berdi. Qazir munda 3 myń bala birneshe sala boıynsha tárbıe alyp júr. Jyl sońyna deıin 8 myń balany úıirmemen qamtý josparda bar.
«Bolashaq sáýletshiler men dızaınerlerge arnaıy kýrs ashyldy. Sonymen qatar, teatr sheberhanasy, bı úıirmesi, balet stýdııasy bar. Keme jasaý sheberhanasy qarastyrylǵan. Balalar shetel tilderin meńgere alady. Shyǵarmashylyq akademııasynda robototehnıka, «Aspan» avıa jáne raketa jasaý sheberhanalary, avtomodel úıirmesi, gımnastıka, taekvon-do jáne qazaqsha kúres úıirmeleri, «Espıranto» shet tilderdi damytý mektebi jumys isteıdi»,- dedi shyǵarmashylyq akademııasy dırektorynyń mindetin atqarýshy Shamshat Jubaı.
Al «Týǵan jerge taǵzym» aktsııasy aıasynda 555 joba iske asyrylý ústinde. Olardyń quny - 2,8 mıllıard teńge.
Atalmysh jobalar «Týǵan jerge taǵzym» jáne «Rýhanı jańǵyrý» baǵdarlamalary aıasynda uıymdastyrylǵan «Týǵan jer» respýblıkalyq forýmy barysynda tanystyryldy.
Forým kezinde óńir basshysy Berdibek Saparbaev, Memlekettik hatshy Gúlshara Ábdiqalyqova Densaýlyq saıabaǵyna bardy. Bul saıabaq oblys ákimi Berdibek Saparbaevtyń bastamasymen qolǵa alynǵan is. Demalýshylarǵa shaǵyn fýtbol alańy, velosıped joly, júgirý joly qarastyrylǵan. Munda medıtsına qyzmetkerleri apta saıyn túrli aktsııalar uıymdastyryp, ıoga, skandınavııalyq júris jattyǵýlaryn tegin ótkizedi.
Sonymen qatar, forýmǵa qatysýshylarǵa Jekpe-jek saraıy tanystyryldy. Bul nysan bıznestiń áleýmettik jaýapkerligi aıasynda boı kóterdi. Qazirgi kezde munda QR Prezıdentiniń júldesine arnalǵan halyqaralyq týrnır ótip jatyr. Jarysqa Ázerbaıjan, Grýzııa, Qyrǵyzstan, Reseı, Ózbekstan, Ýkraına, Ońtústik Koreıa elderinen sportshylar keldi.
«Týǵan jer» forýmy aıasynda Aqtóbede alǵash ret jekpe-jek saraıy ashylyp otyr. Prezıdent kýbogynyń jańa sport saraıynda ótkizilýiniń óz máni bar. Óıtkeni Memleket basshysy jas kezinen kúrespen aınalysqan, óskeleń urpaqqa ónege kórsetip kele jatqan jan-jaqty tulǵa. Ol elimizdegi sport salasynyń damýyna udaıy qamqorlyq tanytyp otyrady. Zamanaýı keshen Elbasy tapsyrmasynyń iske asyrylyp jatqanyn kórsetedi»,- dedi Memlekettik hatshy Gúlshara Ábdiqalyqova.
Keıin forým qatysýshylaryna Jubanovtar álemi ortalyǵy kórsetildi. Bul nysandy salýǵa kásipker Qaırat Máıtekov 300 mıllıon teńge bóldi. Munda aǵaıyndy Jubanovtardyń jeke zattary men týyndylary saqtalatyn bolady. Ajar Jubanovanyń aıtýynsha, ár baǵytta júrgen Jubanovtardyń urpaqtary bilim, mádenıet, óner salasynda sheberlik sabaqtaryn ótkizýge daıyn.
«Aqtóbe jerinen kóp belgili adamdar shyqqan. Máselen, álemdi tańǵaldyrǵan Dımash Qudaıbergen ákemniń esimimen atalǵan mýzykalyq kolledjdi bitirgen bala. Qazaqtyń mýzykasyn joǵary deńgeıge jetkizgen aǵaıyndy Jubanovtar edi. Olardyń balalary qazir ár salany tańdap, joǵary jetistikke jetip júr»,- dedi Ajar Jubanova. Al demeýshi bolǵan kásipker bul óner ordasynda Dımash Qudaıbergendeı talanttardyń tárbıelenetinine senimdi.
«Aqtóbeniń mádenıeti, shyǵarmashylyq salasy damıdy degen maqsatpen Jubanovtar álemi ortalyǵyn salǵan edik. Ortalyqta ánshi Dımash Qudaıbergendeı juldyzdar tárbıelenedi degen senim bar. Munda vokal, bı úıirmesi, dızaınerlik mektep pen akterlik sheberlik sabaǵy ótedi»,- dedi Qaırat Máıtekov.