QR IDM basshylyǵy AEF aıasynda 30-dan astam kezdesý ótkizedi
Latvııanyń kólik mınıstri Ýldısom Aýgýlıspen bolǵan kezdesýde avtomobıl joldaryn salý jáne Astanadan Latvııaǵa turaqty avıareıster ashý máseleleri talqylandy.
«Búgingi kúnniń eń basty mindetteriniń biri - Qazaqstan, QHR jáne Eýropa elderi arasyndaǵy halyqaralyq tranzıtti damytý bolyp tabylady. Biz jol, ınfraqurylym nysandaryn, porttar salýdamyz. Biz óz elimizdi eýropadaǵy tolyqqandy seriktes sanaımyz, bul jónindegi bizdiń múddelerimiz ortaq», - dep atap kórsetti Á. Isekeshev.
Azııalyq Damý Bankiniń vıtse-prezıdenti Venchaı Jangpen kezdesý barysynda taraptar Qazaqstan Respýblıkasyndaǵy jol-kólik ınfraqurylym, joldardyń qaýipsizdigin qamtamasyz etý, turaqty kólik júıesin damytý salalaryndaǵy yntymaqtastyqty odan ári damytýdyń perspektıvalaryn talqylady.
Qazirgi ýaqytta ADB-men birlesip eki avtojol jobasy iske asyrylýda: «Batys Eýropa -Batys Qytaı» jáne «Beıneý-Aqtaý». Jańadan eki jobany júzege asyrý josparlanýda, ıaǵnı olardyń ishinde «Aqtóbe-Maqat» jáne «Ortalyq-Batys» jobalary bar. Munyń syrtynda, ADB Qazaqstan tarapyna temir jol salasynda jańa yntymaqtastyq baǵyttaryn qarastyrýdy usyndy.
«Yntymaqtastyqtyń týrızm ındýstrııasyn damytý jańa baǵyty retinde alǵa shyǵýy bola alady, óıtkeni ol ulttyq ekonomıkany damytýǵa, jańa jumys oryndaryn ashýǵa qolaıly jaǵdaı týdyrady», - dedi Á. Isekeshev.
Qazaqstan Respýblıkasy jáne ADB 20 jyldan astam ýaqyttan beri tyǵyz yntymaqtastyqta jumys jasaýda. Bul qarjy ınstıtýtynyń bizdiń elimizdiń ekonomıkasynyń damýyna qosqan úlesi 1 trln. 5 mlrd. teńgeden asady.
AEF aıasynda QR ınvestıtsııalar jáne damý mınıstrligi sheteldik memleketter úkimetteri ókilderimen, sondaı-aq iri halyqaralyq kompanııalar, onyń ishinde transulttyq kompanııalar ókilderimen barlyǵy 30-dan astam kezdesý ótkizýdi josparlaýda.
QR IDM tarapynan Germanııa, Italııa, Qytaı, Polsha kompanııalarymen energetıka, AÓK, metallýrgııa, hımııa jáne tamaq ónerkásibi, ınfraqurylymy salalary boıynsha 10-ǵa jýyq kommertsııalyq qujatqa qol qoıylady dep kútilýde.
