QR Elshisi Beıjińdegi stýdenttermen kezdesti

BEIJІŃ. QazAqparat - Qazaqstan Respýblıkasynyń Qytaı Halyq Respýblıkasyndaǵy Elshisi Shahrat Nuryshev pen rektor Erlan Sydyqov bastaǵan L.Gýmılev atyndaǵy Eýrazııa ulttyq ýnıversıtetiniń (EUÝ) delegatsııasy Qytaıdaǵy qazaqstandyq stýdentter qaýymdastyǵynyń (KSAC) Beıjińdegi belsendilerimen kezdesti, dep habarlaıdy «QazAqparat» HAA-nyń QHR-daǵy menshikti tilshisi.

Stýdentterdiń aldynda sóz sóılegen Sh.Nuryshev Prezıdent Nursultan Nazarbaevtyń Qazaqstan halqyna Joldaýy men naýryz aıynyń basynda jarııalanǵan 5 áleýmettik bastamanyń negizgi baǵyttary týraly aıtty.

«Ózderińiz kórip otyrǵandaı, Qazaqstan Prezıdenti bastamalarynyń basym bóligi jastarmen tikeleı baılanysty, sebebi alǵa qoıylǵan maqsattarǵa keleshektegi bilimdi urpaqtyń kúsh-qýatymen ǵana jetýge bolady. QHR Bilim mınıstrliginiń málimetine sáıkes, qazirgi ýaqytta Qytaıda 14224 qazaqstandyq stýdent bilip alyp jatyr. Olardyń 2,5 myńy Beıjińde oqýda», - dedi ol.

Dıplomat jetkilikti deńgeıde tártipti saqtaý, patrıottyq tárbıe men QR jetistikterin nasıhattaý baǵytyndaǵy KSAC jumysyna oń baǵa berdi. Sonymen birge, ol oqýdaǵy úlgermeýshilik jaǵdaılaryn, qazaqstandyq azamattardyń qylmystyq jaǵdaılarǵa tap bolýy (tóbeles, ishimdik ishý, esirtki qabyldaý jáne t.s.s.), vızalyq tártiptiń buzylýy, bilim maqsatynan tys kásipkerlikpen nemese ózge de ispen aınalysý máselerin de atap ótti.

Elshi stýdentterdi bilim protsesine jiti mańyz berip, bilim kókjıegin keńeıtip, shetelde elimizdiń atyn laıyqty túrde shyǵarýǵa shaqyrdy.

L.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov jas órendermen birge Qazaqstan Prezıdenti Nursultan Nazarbaevtyń bes áleýmettik bastamasyn, «Rýhanı jańǵyrý» maqalasyn júzege asyrý sharalaryn talqylady. Ol KSAC-qa bir kún buryn Sıanda tanystyrylǵan, qytaı tiline aýdarylǵan «Shákárim» kitabyn tabys etti.

Jıyn erekshe ótti dese bolady. Stýdentter rektor Erlan Sydyqovqa stýdenttik ómirge, QR men QHR Joǵarǵy oqý oryndary arasyndaǵy akademııalyq baılanysqa, sonymen qatar oqýdan keıin Qazaqstanda jumys turýǵa qatysty kóptegen saýaldaryn qoıýýǵa múmkindik aldy.

Jıyn sońynda Qazaqstan Elshisi oqýda jáne qoǵamdyq jumysta ozat tanylǵan stýdentterge Alǵys hat tabystady.

«Memleket basshysy tehnıkalyq mamandyq boıynsha granttar sanynyń ósýin bastama etip kóterip otyr. Sheteldik JOO-lardan kem túspeıtin bizdiń ýnıversıtetterdiń damýyna osynshama qarajat bólingeni qýantady. Máselen, meniń kóptegen tanystarym Nazarbaev Ýnıversıtetine túskisi keledi. Álbette, bul turǵyda eń birinshi kezekte biz qazaqstandyq bilim men ǵylymnyń tehnıkalyq bilimin damyta bilýimiz kerek», - dep suhbat berdi qytaılyń JOO-lardyń birindegi «avıatsııalyq qozǵaltqysh» fakýlteti doktorantýrasynyń 2-shi kýrs stýdenti Maksım Ovchınnıkov.