QR DSM zııandy taǵamdardyń jarnamasyna shekteý qoıýdy qarastyrýda

ASTANA. QazAqparat - QR Densaýlyq saqtaý mınıstrligi quramynda qant, tuz jáne trans-maılary kóp azyq-túlik ónimderiniń jarnamasyna shekteý qoıýdy usyndy, dep habarlaıdy QazAqparat tilshisi.

Mınıstrliktiń habarlaýynsha, adam densaýlyǵyna zalal tıgizetin mundaı taǵamdarǵa shekteý qoıý damyǵan elderdiń tájirıbesinde bar.

"2018 jyly Halyq densaýlyǵy jáne densaýlyq saqtaý júıesi týraly kodeks jobasyna quramynda qant, tuz, trans-maılary kóp taǵamdardyń jarnamasyn shekteý jóninde tolyqtyrýlar engizý josparlanyp otyr. EAEO aıasynda kedendik odaqtyń tehnıkalyq reglamentterine densaýlyqqa zııan qant, tuz, trans-maılar quramyna jáne olardyń tańbalanýyna talaptardy kúsheıtý turǵysynda tolyqtyrýlar engizilýi qajet", - dedi  QR Densaýlyq saqtaý vıtse-mınıstri Alekseı Tsoı mınıstrlik alqasynyń keńeıtilgen otyrysynda.

Onyń aıtýynsha, EYDU elderiniń tájirıbesi qoǵamdyq densaýlyq saqtaý salasynda qabyldanǵan sharalardyń tıimdiligin kórsetti. Máselen, Fınlıandııada 2010 jyldan bastap táttiler men alkogolge salyq salynyp, quramyna tuzy kóp jáne tuzdalǵan ónimderge tyıym salyndy. Nátıjesinde, 7 jyl ótken soń juqpaly emes aýrýlardyń deńgeıi 80%-ke azaıǵan, ómir súrý uzaqtyǵy 1980 jylmen salystyrǵanda 10 jylǵa uzarǵan.

Majarstanda 2011 jyldan bastap zııandy azyq-túlikterge densaýlyq saqtaý salyǵy salynyp keledi jáne búginde halyqtyń zııandy taǵamdardy tutyný kólemi 73%-ke azaıǵan. 

Eýropada 2016 jyldan bastap, quramynda 6 ıngredıent - maı, tuz, qant, trans-maılar, kómirsý men aqýyzy bar azyq-túlik ónimderin tańbalaý mindetteldi. Ulybrıtanııada kúndizgi ýaqytta zııandy taǵamdardy jarnamalaýǵa tyıym salynǵan.

Foto: cdn-image.foodandwine.com