QR AShM 1 myń tonnaǵa jýyq karantınge jatqyzylǵan ónimdi anyqtady

NUR-SULTAN. QazAqparat - Agroónerkásiptik keshendegi memlekettik ınspektsııa komıtetiniń aýmaqtyq bólimsheleri karantındik fıtosanıtarııalyq baqylaýdy júzege asyrý kezinde 1 myń tonnaǵa jýyq ımporttyq karantınge jatqyzylǵan ónimdi anyqtady, dep habarlaıdy QazAqparat QR Aýyl sharýashylyǵy mınıstrliginiń baspasóz qyzmetine silteme jasap.

Karantınge jatqyzylǵan ónim Reseı Federatsııasy, Belarýs, Fınlıandııa, Ózbekstan, Qyrǵyzstan, Nıderlandy jáne Koreıa Respýblıkasynan ákelingen.

2021 jylǵy 22-29 qazan aralyǵynda agroónerkásiptik keshendegi memlekettik ınspektsııa komıtetiniń aýmaqtyq ınspektsııalary Qazaqstan Respýblıkasynyń aýmaǵyna fıtosanıtarııalyq táýekeli joǵary karantınge jatqyzylǵan ónimdi zańsyz ákelýdiń 82 faktisiniń jolyn kesti.

Nur-sultan qalasyna Nıderlandydan 1,2 tonna qyzanaqty ımporttaý kezinde «Qyzanaq jemisteriniń qońyr qatparly vırýsy» (Tomato brown rugose fruit virus (ToBRFV) jáne «Pepıno mozaıka vırýsy» karantındik obektileri (Pepino mosaic virus) anyqtaldy.

Sonymen qatar, Qyrǵyzstan men Ózbekstannan Jambyl jáne Mańǵystaý oblystaryna 21,9 tonna qurma ónimin ımporttaý kezinde «Komstok symyry» (Pseudococcus comstoki) karantındik obektisi anyqtaldy.

Ósimdikter karantıni salasyndaǵy atalǵan zań buzýshylyqtar boıynsha ákimshilik materıaldar qurastyrylyp, sotqa joldandy.

21,9 tonna qurma ónimi Ózbekstan Respýblıkasy men Qyrǵyzstanǵa qaıtaryldy.

Reseı Federatsııasynan jalpy kólemi 768 tonna kartop, sábiz, qyzylsha, qyzanaq, burysh, maqsary, bıdaı, jańǵaqtar, keptirilgen jemister, apelsın, alma jáne banan, Qyrǵyzstannan 22 tonna jemshóp espartseti, Koreıadan 1,5 tonna júgeri uny jáne Nıderlandydan 139 780 dana gúl kesindileri ımporty kezinde 56 jaǵdaıda fıtosanıtarııalyq sertıfıkattardyń joqtyǵy belgili boldy.

1 jaǵdaıda Reseı Federatsııasynan 108 060 dana kóshet ákelý kezinde tańbalaýy joq bolyp shyqty.

Reseı Federatsııasynan jalpy salmaǵy 140 tonna kartop, qyzanaq, apelsın, qarbyz, qara órik, alma, un, astyq qaldyqtary, jarma, Belarýsten 48 843 dana kóshet, Fınlıandııadan 25 tonna jańǵaq jáne Qyrǵyzstannan 7 tonnadan astam kartop, qyzanaq jáne júzim ımporty kezinde 20 jaǵdaıda karantınge jatqyzylǵan ónim qaıtalama tekserýge usynylmaǵan.

Ósimdikter karantıni salasyndaǵy zańnamanyń buzylýyna jol bergen kináli tulǵalarǵa qatysty QR ÁQBtK-niń 400-baby boıynsha ákimshilik materıaldar jasalyp, 4,3 mln.teńgeden astam somaǵa aıyppul salyndy.

Jyl basynan beri Qazaqstan Respýblıkasy Aýyl sharýashylyǵy mınıstrligi Agroónerkásiptik keshendegi memlekettik ınspektsııa komıtetiniń aýmaqtyq ınspektsııalary ósimdikter karantıni salasynda 5,3 myń buzýshylyqty anyqtap, nátıjesinde 393 mln teńgeden astam somaǵa ákimshilik aıyppul salyndy.