QPL: «Jetisý» komandasyna tehnıkalyq jeńilis jazyldy

ASTANA. KAZINFORM - «Jetisý» komandasyna Qazaqstan Premer-lıgasynyń HH týryndaǵy «Oqjetpeske» qarsy kezdesýine qatysty sharalar qabyldanyp, taldyqorǵandyq klýbqa tehnıkalyq jeńilis jazyldy.

Bul oıynda teldyqorǵandyq klýb Qazaqstan chempıonaty reglamentin 6.56 tarmaǵyn saqtamaǵany úshin jazalandy. Atalǵan tarmaqta bir fýtbolshynyń ártúrli komanda quramynda bir týrdyń oıynyna qatysa almaıtyny kórsetilgen.

Oıynshy Nurbol Ánýarbekov budan buryn aldyn ala ótkizilgen HH týrda elordalyq «Jeńis» sapynda Almatynyń «Qaıratyna» (09.05.2025 j.) qarsy kezdesýde jasyl alańǵa shyqqan edi. Sondaı-aq ol «Jetisý» jáne «Oqjetpes» (11.08.2025 g.) oıynyna qatysty. Bul tıisti talapty saqtamaýshylyq bolyp sanalady.

Aıta ketsek, «Jetisý» jáne «Oqjetpes» kezdesýinde taldyqorǵandyq komanda 2:1 esebimen basym túsken edi. Oıyn barysynda Nurbol Ánýarbekov negizgi quramda alańǵa shyǵyp, 77-mınýtta qaqpany dál kózdedi. Ony 88-mınýtta taldyqorǵandyq klýb sapynan basqa fýtbolshy almastyrdy.

Endi «Jetisý» aldaǵy týr oıynyn 17 tamyzda óz alańynda «Atyraý» komandasyna qarsy ótkizedi.