QPL: «Jeńis» jeńisti serııasyn jalǵastyrdy

ASTANA. KAZINFORM - Fýtboldan Premer-lıga komandalary arasyndaǵy el birinshiliginiń HVI-týrynda elordalyq «Jeńis» óz alańynda Taldyqorǵannyń «Jetisýyn» súrindirdi.

Astanalyq komanda birinshilikti sátsiz bastady. Kóp oıynda jeńiske jete alǵan joq. Dese keıingi týrda olarǵa sáttilik joldas bolyp júr. Sońǵy bes týrdyń tórteýinde jeńiske jetip, bireýinde teń nátıjege qanaǵat bildirdi.

Astanalyq fýtbolshylar búgingi oıynda taldyqorǵandyq komandanyń qorǵanysyn jıi mazalap, álisin-álsin serııaly shabýyl uıymdastyrdy. Nátıjesinde olardyń qaqpasyna úsh gol soqty. Bul goldardy Aslan Ádil 31, Dinmuhamed Qaraman 41, Ardaq Sáýlet 61-mınýtta óziniń enshisine jazdy. Oǵan «Jetisý» sapynan 68-mınýtta Jansultan Muhamethanov bir golmen jaýap qaıyrdy.
Osylaısha «Jeńis» qarsylasynan 3:1 esebimen basym túsip, týrnır kestesinde 20 upaımen 8-orynǵa kóterildi.

Taǵy bir kezdesýde Qostanaıdyń «Tobyly» óz alańynda kókshetaýlyq «Oqjetpesti» 2:1 esebimen jeńdi. Oıyn barysynda qostanaılyq klýbtan Jaslan Jumashev 64, 72-mınýtta eki gol soqsa, 43-mınýtta kókshetaýlyq fýtbolshy Dáýren Jumat penaltıden múlt ketken joq.

Bul týrdy «Ordabasy» (Shymkent) men «Astana» kezdesýi túıindeıdi. Atalǵan oıynda ázirge esep - 0:0.

Aıta ketsek, 12 shildede Túrkistannyń «Turany» Petropavldyń «Qyzyljaryna» 1:2 esebimen ese jiberse, jezqazǵandyq «Ulytaý» men Semeıdiń «Elimaıy» 1:1 esebine qanaǵat bildirdi.

Bul týrdaǵy aldyn ala ótkizilgen oıyndarda 16 sáýirde almatylyq «Qaırat» «Atyraýdy» 4:0 esebimen jeńse, 14 mamyrda qyzylordalyq «Qaısar» «Aqtóbege» 1:2 esebimen ese jiberdi.