QPL: «Tobyl» men «Ordabasy» kezdesýi keıinge shegerildi

ASTANA. KAZINFORM - Fýtboldan Qazaqstan Premer-lıgasy toǵyzynshy týryndaǵy «Tobyl» men «Ordabasy» kezdesýi belgisiz merzimge keıinge shegerildi.

Bul jóninde fýtboldan Qazaqstan kásibı lıgasy málim etti.

2025 jylǵy 18 mamyrǵa josparlanǵan «Tobyl» (Qostanaı) men «Ordabasy» (Shymkent) arasyndaǵy 9-týr matchy keıinge shegerildi. Ol fors-majorlyq jaǵdaılarǵa baılanysty, ıaǵnı aldyn ala boljaý jáne aldyn alý múmkin bolmaǵan sebepterge oraı qabyldandy. Atalǵan sheshim Qazaqstan Premer-lıgasy klýbtary arasyndaǵy fýtbol chempıonatynyń Reglamentiniń 6.25-babynyń 5-tarmaǵyna jáne 6.32-babyna sáıkes júzege asty. Matchtyń jańa kúni týraly qosymsha habarlanatyn bolady, dep jazylǵan habarlamada.

Aıta ketsek, «Ordabasy» klýby basshylyǵy 17 mamyrda komanda Túrkistan qalasynan Qostanaı qalasyna aýa raıynyń qolaısyzdyǵyna baılanysty usha almaǵanyn málimdegen. Osyǵan baılanysty, Qazaqstan Premer-lıgasynyń 9-týr aıasyndaǵy «Tobyl» men «Ordabasy» matchyn keıinge shegerý týraly sheshim qabyldandy.

Eske salsaq, búgin atalǵan týrda «Ulytaý» (Jezqazǵan) men «Astana» oınasa, «Jeńis» (Astana) pen «Qyzyljar» (Petropavl), «Qaısar» (Qyzylorda) men «Turan» (Túrkistan), «Elimaı» (Semeı) men «Qaırat» (Almaty) komandalary sheberlik baıqasady.

Al 17 mamyrda kókshetaýlyq «Oqjetpes» óz alańynda «Aqtóbege» 1:3 esebimen ese jiberse, «Atyraý» men «Jetisý» (Taldyqorǵan) 1:1 esebine qanaǵat bildirdi.