QPL: «Qaırat» jańa bapkerimen alǵashqy jeńisine qol jetkizdi

ASTANA. KAZINFORM - Fýtboldan Qazaqstan Premer-lıgasynyń VII týrynda jergilikti «Qaırat» komandasy óz alańynda «Atyraýdan» basym tústi. 

Almatylyq klýb sońǵy úsh týrda jeńiske jete almaı keldi. Aldymen «Jetisýmen» 1:1 esebimen teń tússe, odan keıin «Aqtóbeden» 1:3, «Qaısardan» 0:1 esebimen jeńilip qaldy.

Bul sátsizdikten keıin komandanyń bas bapkeri Kırıll Keker qyzmetimen qosh aıtysqan bolatyn. Onyń ornyna ýaqytsha mindetin atqarýshy bolyp Rafael Ýrazbahtın taǵaıyndalǵan edi.

Búgingi kezdesý barysynda almatylyq klýb jyldam gol soǵýǵa tyrysty. Degenmen birinshi kezeńde tablodaǵy esepke ózgeris engen joq. Ekinshi kezeńniń 51-mınýtynda «Qaırattyń» jartylaı qorǵaýshysy Erkebulan Seıdahmet mergendik tanytyp, óz komandasyn esepte alǵa shyǵardy.

Úsh oıynǵa sozylǵan sátsizdikter serııasyn toqtatqan «Qaırat» qarsylasyn 1:0 esebimen jeńip, týrnır kestesinde úshinshi orynǵa kóterildi. 

Al, Qostanaıdyń «Tobyly» óz alańynda Taldyqorǵannyń «Jetisýyn» 1:0 esebimen tize búktirdi. Bul kezdesýde jalǵyz goldy Godberg Kýper 7-mınýtta óziniń enshisine jazdy. 

Endi 19.00-de «Aqtóbe» men «Astana» jasyl alańǵa shyǵady.

Sondaı-aq búgin, 4 mamyrda «Elimaı» «Jeńisten» 2:1, «Turan» «Qyzyljardan» 1:0 esebimen basym tústi. 

Atalǵan týrdy 5 mamyrda 19:00-de «Shahter» men «Qaısar» túıindeıdi.