QPL: «Qaırat» syrt alańda «Tobyldan» basym tústi

ASTANA. KAZINFORM - Búgin fýtboldan Premer-lıga komandalary arasyndaǵy el birinshiliginiń HVIIІ týrynyń taǵy eki oıynynyń nátıjesi belgili boldy.

Týrnır kestesinde «Tobyl» (Qostanaı) men «Qaırat» (Almaty) komandalary qatarlas keledi. Ekeýi de qazir úzdik úshtikte tur. Bas júldege úmitker klýbtar qataryna kiredi.

Kezdesý barysynda komandalar shabýylǵa kóbirek kóńil bóldi. Oıyn basynan bir-biriniń qaqpasy mańynda jıi boı kórsetti. Nátıjesinde almatylyq klýb sapynan Jorjıno 45-mınýtta esep ashsa, 68-mınýtta Valerıı Gromyko basymdyqty arttyrdy.

Al qostanaılyq komandadan Ahmed El-Messaýdı 77-mınýtta penaltıdi múltiksiz oryndasa, odan keıin «Qaırat» sapynan Rıkardıno kezdesýdiń núktesin qoıdy. Osylaısha almatylyq fýtbolshylar syrt alańda qarsylasynan 3:1 esebimen basym tústi.

Sondaı-aq taǵy bir kezdesýde semeılik «Elimaı» óz alańynda Taldyqorǵannyń «Jetisýyn» 3:0, qyzylordalyq «Qaısar» Petropavldyń «Qyzyljaryn» 1:0 esebimen jeńdi. Al 25 shildede «Jeńis» (Astana) pen «Oqjetpes» (Kókshetaý) 0:0 esebine qanaǵat bildirdi.

Bul týrdaǵy 30 sáýirde aldyn ala ótkizilgen oıynda «Atyraý» óz alańynda «Astanaǵa» 0:2 esebimen jol bergen edi.

Sondaı-aq 27 shildede 20:00-de «Turan» (Túrkistan) men «Ordabasy» (Shymkent) sheberlik baıqasady.