QPL: «Atyraý» qatarynan jetinshi márte jeńildi

ASTANA. KAZINFORM — Fýtboldan Premer-lıga komandalary arasyndaǵy Qazaqstan chempıonatynyń aldyn-ala ótkizilgen 18-týryndaǵy «Atyraý» jáne «Astana» kezdesýiniń nátıjesi belgili boldy. 

Jankúıerler kókeıinde alty týr boıy jeńiske jetip kórmegen atyraýlyq klýb kósh basyndaǵy elordalyq komandaǵa qandaı qaýqar kórsete alady degen saýal turdy. Esesine «Astana» alty kezdesýde tórt márte jeńiske jeti, ekeýinde teń nátıjeni tirkedi. Týrnır kestesinde kósh basynda keledi.

Oıyn barysynda elordalyq komandanyń belsendiligi baıqalyp turdy. Osyndaı sátterdiń birinde «Atyraý» qaqpasyna belgilengen penaltıden Nazmı Grıpshı múlt ketken joq.

Ekinshi kezeńde astanalyq ujym basymdyqty arttyra tústi. Alań ıeleri qaqpasy mańynda jıi boı kórsetti. Olardyń tarapynan jasalǵan shabýyldyń birinde 71-mınýtta Marın Tomasov kózdegen nysanadan múlt ketken joq.

Osylaısha «Astana» qarsylasynan 2:0 esebimen basym túsip, týrnır kestesinde segiz oıynnan keıin almatylyq «Qaıratpen» upaıy teńesti.

Al «Atyraý» qatarynan jetinshi márte jeńildi.

Endi jetinshi týrda 3 mamyrda «Atyraý» óz alańynda shymkenttik «Ordabasyny» qabyldasa, 4 mamyrda «Astana» syrt alańda qyzylordalyq «Qaısarmen» oınaıdy.

Eske salsaq, budan buryn fýtboldan Qazaqstan kásibı lıgasynyń sheshimimen naýryz aıynyń úzdik bapkeri men oıynshylary anyqtaldy.