QPL: «Astana» óz alańynda keremet kambek jasady

ASTANA. KAZINFORM - Fýtboldan Premer-lıga komandalary arasyndaǵy el birinshiliginiń HІІ týrynda elordalyq «Astana» komandasy kezekti jeńisine qol jetkizdi.

Kezdesýdiń birinshi bóliginde kókshetaýlyq fýtbolshylar elordalyq komandaǵa jyldam eki gol soǵyp, oıyn tizginin óz qoldaryna alǵan. Alaıda Grıgorıı Babaıan jattyqtyratyn komanda oıynshylary tez es jıyp, 8 mınýttyń ishinde qarsylas qaqpasyna úsh dop engizip, úziliske keremet kóńil kúımen shyqty. Osylaısha tartysqa toly oıynnyń alǵashqy kezeńinde-aq kórermender 5 gol kórdi. 

«Oqjetpes» sapynan 7 mınýtta Strahınıa Iovanovıch pen 26 mınýtta Nıkola Tsktskıch kózge tússe, «Astana» komandasynan 29 mınýtta Ýsman Kamara, 33 mınýtta Nazmı Grıpshı, 37 mınýtta Marın Tomasov gol soqty. 

Ekinshi taımda alań ıeleri osy basymdyqty ýystan shyǵarmaýǵa tyrysty. Matchtyń 57 mınýtynda Maks Ebong esepti 4:2-ge jetkizdi. Al oıyn aıaqtalar tusta, ıaǵnı 86 mınýtta elordalyq komandanyń túlegi Stanıslav Basmanov kezdesýdiń núktesin qoıdy. Qorytyndy esep - 5:2. 

Dál qazir «Ordabasy» (Shymkent) men «Elimaı» (Semeı), «Qaısar» (Qyzylorda) men «Tobyl» (Qostanaı) arasyndaǵy kezdesý ótip jatyr. 

Buǵan deıin atalǵan týrda «Qaırat» pen «Jetisý» teń tarqassa, «Jeńis» birinshiliktegi bıylǵy maýsymynda alǵashqy jeńisine qol jetkizdi.