Kózi nashar kóretin múgedek sotta Forte bank-ti jeńip shyqty

ALMATY. QazAqparat - Kózi nashar kóretin Anatolıı Mıgaı Forte bank-ten 350 myń teńge kóleminde moraldyq ótemaqysyn qaıtardy, dep habarlaıdy QazAqparat tilshisi. 

Medeý aýdandyq soty Anatolıı Mıgaıdyń ekinshi deńgeıli bankke qarsy talabyn qanaǵattandyryp, moraldyq nuqsan keltirgeni úshin Forte bank-ten 350 myń teńge óndirý týraly sheshim shyǵardy. 

«Bank ókilderi qarsy ýáj aıta almady. Mıgaı myrza da shyqqan nátıjege rıza, ol tipti ótemaqy týraly oılamaǵan da edi. Biz úshin bankterdiń kózi nashar kóretin adamdardyń quqyǵyn taptamaýy mańyzdy. Bul máseleni sotqa deıin tyndyrýdy kózdegen bolatynbyz. Alaıda bank ótinishimizge qulaq asqan da joq»,-deıdi Adam quqyǵy jónindegi bıýro zańgeri Anna Smırnova. 

Onyń aıtýynsha, eger bank qajet dep tapsa, 2 aı ishinde sheshimdi appellıatsııaǵa bere alady. Bul sot múgedek jandardyń óz múmkindikterin tolyq paıdalanýǵa haqysy bar ekenin aıqyndap berdi. Búginde Qazaqstanda 20 myńǵa jýyq kózi nashar kóretin adamdar bar. Olardyń kóbi osyndaı máselege tap bolǵan. 

Eske sala ketsek, atalǵan bank klıenttiń depozıttik shotyn óz betimen paıdalaný quqyǵyn shektegen. Esesine senimdi adamnyń kómegine júginýin suraǵan. 

Alaıda mundaı serigi joq ári munymen ózi aınalysqysy kelgen klıent pen bank arasynda qaıshylyq týyndaıdy. 
Al memleketimizdiń zańynda kózi nashar kóretin qoǵam múshelerine jeke shotyn basqarýǵa tyıym joq.