Kóz dárigeri Kúlıza Aldanyshqyzy Indonezııadaǵy halyqaralyq syılyqty jeńip aldy - sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Dımash Qudaıbergen Stambýlda baspasóz máslıhatyn ótkizdi - TRT
26 aqpan kúni Qazaqstannyń álemge tanymal jas ánshisi Dımash Qudaıbergen Stambýlda baspasóz máslıhatyn ótkizdi.
Baspasóz máslıhaty barysynda Dımashtyń jańa «When I’ve got you» beınebaıanynyń tusaýy kesildi. Rásim aıasynda ánshi beınebaıannyń ıdeıa avtory ózi ekenin aıtty.
Bul týraly osy aptada Túrkııa Radıo televızııa portaly habarlady.
«Klıptiń rejısseri, ári jelilik prodıýseri Jánibek Ǵusmanovtyń habarlaýynsha beınebaıan Almaty qalasynda túsirildi. Onyń aıtýynsha, beınebaıandy túsirý kezinde Qytaıdan kelgen 70 maman jumys istegen jáne dál sol jerde arnaıy kostıým tigilip, erekshe obrazdar jasalǵan», - dep jazady túrkııalyq BAQ.
Stambýlda ótken baspasóz máslıhatynda Dımash túrkııalyq jankúıerlerimen qazaq, túrik, aǵylshyn jáne orys tilderinde tildesti ári jýrnalısterdiń suraqtaryna jaýap bergen. Sondaı-aq jıyn barysynda jeke kontserti Túrkııada 24 mamyr óziniń 30 jasqa tolýyna oraı «Tıýprash» stadıonynda ótetinin aıtty. Aıta keteıik, bul stadıonda ataqty Maıkl Djekson, Rıanna, Shakıra sııaqty ánshilerdiń jeke kontsertteri de bolǵan.
Sonymen qatar osy aptada «TRT»-da «Stambýl áýejaıy Eýropada birinshi oryndy ıeledi» degen taqyryptaǵy aqparat jaryq kórgen.
Túrkııalyq BAQ-tyń dereginshe, Stambýl áýejaıy 12-18 aqpan kúni ortasha eseppen 1 myń 302 reıspen Eýropadaǵy eń kóp qoldanylǵan áýejaı atandy. Bul aqparat alǵashynda Eýropalyq aeronavıgatsııa qaýipsizdigi uıymynyń (Evrokontrol) 12-18 aqpan kúngi Eýropalyq avıatsııalyq esebi jarııalanǵan.
«TRT»-nyń kelitirgen málimetine súıensek, Stambýl áýejaıy osy kezeńde kúnine ortasha eseppen 1 myń 302 reıspen Eýropa boıynsha eń tyǵyz jumys isteıtin áýejaılar arasynda birinshi oryndy ıeledi. Stambýl áýejaıynan keıin kúnine 1 myń 271 reıspen London Hıtroý jáne 1 myń 265 reıspen Amsterdam Shıphol áýejaılary keldi.
Úrimjide Qazaqstannyń týrıstik áleýetin ilgeriletý boıynsha jınalys ótti – «Halyq gazeti»
29 aqpan kúni Shyńjańnyń Úrimji qalasynda Qazaqstannyń týrıstik áleýetin ilgeriletý jáne B2B resýrstaryn sáıkestendirý boıynsha kezdesý ótti, dep habarlaıdy Qytaıdyń «Halyq gazeti».
Atalǵan BAQ-tyń málimetinshe, Qazaqstannyń «Atameken» Ulttyq kásipkerler palatasy tóralqasynyń tóraǵasy Raıymbek Batalov bastaǵan 40-tan astam delegatsııa múshesi Shyńjańǵa keldi. Olar munda týrızmdi damytý jáne úılestirý boıynsha jumys júrgizbek.
Kóz dárigeri Kúlıza Aldanyshqyzy Indonezııadaǵy halyqaralyq syılyqty jeńip aldy - janadauir.com
35 jyl boıy úzdiksiz kóz dárigeri bolyp jumys istegen, keńesshi dáriger, klınıka professory Kúlıza Aldanyshqyzy Indonezııanyń Balı qalasynda ótken 39-Azııa Tynyq muhıty oftalmologııa akademııasynyń kongresinde APAO-2024 Distinguished service award halyqaralyq deńgeıdegi syılyǵymen marapattaldy, dep jazady mońǵolııalyq janadauir.com basylymy.
Atalǵan BAQ-tyń málimetinshe, bul syılyqtyń mańyzy erekshe. Álemde 8 mıllıardǵa jýyq adamnyń eń keminde 2 mıllıardy kóz aýrýynan zardap shegedi eken.
«Ásirese qazirgi smartfon men ǵalamtordyń órkendeýine oraı kóz aýrýlarynyń kóbeıýine álemdik ǵalymdar qatty alańdaýly. Kóz dárigerleri men osy salany zertteıtin ǵalymdar ár jyl saıyn bas qosyp, atalmysh máseleni talqylaıdy», - dep jazady janadauir.com.
Álemniń keıbir óńirlerinde medıtsına salasy qoljetimsiz bolsa, keı memleketterde baǵasy asa qymbat bolǵandyqtan kózin kórsete almaıtyn adamdar da kezdesedi. Sondyqtan da álemdik ǵalymdar búkil aýyl-qystaqqa deıin jetip jumys isteý qajettigin eskertedi. Baıan-Ólgeı aımaǵynyń dárigeri Kúlızaǵa kelsek, kóp jyl boıy atalǵan aımaqtaǵy halqyna qyzmet kórsetip keledi eken.
Ol 2007 jyly Úndistanǵa baryp jasandy burshaq ornatý otasyn jasaý kýrsyna tabysty qatysqan. Sondaı-aq, Reseıdiń Gorno Altaı qalasyndaǵy balalardyń kóz emhanasynda bilimin jetildirip kelgen. 2010 jyly Irkýtsk Federov kóz ınstıtýtynda kózdiń qysymy aýrýyna baılanysty bilimin arttyryp kelip, qarııalardyń kózine burshaq salý otasyn jasaǵan. Ol qazirge deıin júzdegen qartqa kóz janaryn syılaǵan altyn qoldy dáriger.
QazUÝ-da parsysha-qazaqsha frazeologııalyq sózdiktiń tusaýkeseri ótti - Parstoday
27 aqpan kúni ál-Farabı atyndaǵy Qazaq Ulttyq ýnıversıteti Shyǵystaný fakýltetiniń Taıaý Shyǵys jáne Ońtústik Azııa kafedrasy osy ýnıversıtettiń 90 jyldyǵy aıasynda jaryq kórgen parsysha-qazaqsha frazeologııalyq sózdiktiń tusaýkeserin ótkizdi.
Bul týraly osy aptada Irannyń «Parstoday» aqparat agenttigi de habarlady.
Irandyq basylymnyń málimetinshe, tuńǵysh ret jaryq kórip otyrǵan parsysha-qazaqsha frazeologııalyq sózdikke parsy tilinde jıi qoldanylatyn maqal-mátelder, qanatty sózder, sypaıylyq formýlasyna jatatyn sóz tirkesteri men aýyzeki tilde jıi qoldanylatyn alǵys, qarǵys, qolpashtaý, tańdaný jáne t.b. qatysty turaqty sóz tirkesteri engen.
Parsysha-qazaqsha frazeologııalyq sózdik parsy jáne qazaq tilderinde birdeı sóıleıtin oqyrmandarǵa, sondaı-aq parsy tilin úırenýshilerge jáne frazeologızmderdi zertteýshi mamandar men osy taqyrypqa qyzyǵatyn barsha oqyrman qaýymyna arnalady. Bul sózdik parsy tilin úırenýshiler men ırantaný salasy boıynsha jumys isteıtin mamandarǵa asa qajetti kómekshi oqý quraly bolyp tabylady. Sózdikti qurastyrǵandar – Taıaý Shyǵys jáne Ońtústik Azııa kafedrasy ırantaný bóliminiń ustazdary A.J. Boranbaeva, Ǵ.T.Jumadılova jáne Ǵ.Á.Qambarbekova.
Ózbekstan-Qazaqstan: Bilim salasyndaǵy yntymaqtastyq nyǵaıady - «ÓzA»
Ózbekstan men Qazaqstan joǵary bilim jáne ǵylym salalaryndaǵy yntymaqtastyqtyń jańa qadamyna daıyndalyp jatyr. ÓR Joǵary bilim, ǵylym jáne ınnovatsııa mınıstri Sharıpov Qýnǵıratbaı pen Qazaqstannyń Ózbekstandaǵy elshisi Beıbit Atamqulovtyń kezdesýinde osy jaǵdaılar talqylandy.
Bul týraly ózbekstandyq «ÓzA» aqparattyq agenttigi habarlady. Qazaqstan elshiliginiń málimetinshe, qazirgi tańda eki eldiń joǵary oqý oryndary arasynda tikeleı jasalǵan 471 kelisimshart bar.
Ózbekstandyq BAQ-tyń dereginshe, 2023 jyldyń jeltoqsan aıyndaǵy málimet boıynsha, Qazaqstannyń oqý oryndarynda Ózbekstannyń 6 721 azamaty, Ózbekstannyń joǵary bilim berý júıesinde Qazaqstannyń 416 azamaty bilim alýda.
Sonymen qatar, memleket basshylarynyń tapsyrmasy men úkimetaralyq kelisim negizinde Tashkent oblysynyń Shyrshyq qalasynda M.Áýezov atyndaǵy Ońtústik Qazaqstan memlekettik ýnıversıtetiniń fılıalyn jáne Almatyda Tashkent ırrıgatsııa jáne aýyl sharýashylyǵyn mehanızatsııalaý ınjenerleri ınstıtýtyn ashý josparlanǵan.
Kezdesýde Ózbekstan men Qazaqstan basshylyǵynyń el damýynda ǵylym men bilimge basymdyq berip otyrǵany sóz boldy.
Qazaqstan stýdentteri «Túrkııa úni» radıosyna suhbat berdi – CNR
Túrkııa Radıo Televızııa portalynda osy aptada «Túrkııa úni» radıosynyń efırinde Qoja Ahmet ıAsaýı atyndaǵy halyqaralyq qazaq-túrik ýnıversıteti Áleýmettik-gýmanıtarlyq ǵylymdar fakýlteti jýrnalıstıka mamandyǵynyń 4-kýrs stýdentteri Erbaqyt Nyǵmet, Aıaýlym Ábdirahman jáne Nazym Malıkqyzy qatarly bolashaq jýrnalısterden alǵan suhbattary jarııalanǵan.
Radıo efırindegi júrgizýshi Torǵyn Sultanqyzy stýdentterge qoıǵan ártúrli suraqtaryna jaýap alǵan.
Qytaılyq qandasymyz Samǵar Serikuly shańǵy jarysynan bas júldeni jeńip aldy - CNR
Qytaıdyń Іshki mońǵol avtonomııa ólkesi Ýlanchab qalasynda ótken 14-shi kezekti memlekettik qysqy sport túrleriniń dalalyq qar shańǵy jarysynda Samǵar Serikuly atty qandasymyz jeńis tuǵyrynan kórindi, dep habarlaıdy Qytaıdyń Ortalyq halyq radıosy.
Atalǵan BAQ-tyń habarlaýynsha, sporttyq báıgede jastar tobyndaǵy erlerdiń qysqa aralyqqa syrǵanaý jarysynda Shyńjań komandasynyń múshesi Samǵar Serikuly bas júldeni jeńip alyp, altyn medal enshilegen.
