Qoıandy aýylynda sý tasqyny qaýpi áli seıilgen joq
ASTANA. KAZINFORM – Astana irgesindegi Tselınograd aýdany Qoıandy aýylynda tótenshelikter áli kúnge deıin qar sýymen arpalysýda. Buǵan deıin 3 úı jáne 2 úı tıptes ýaqytsha baspana sý astynda qalyp, turǵyndardy áýrege salǵan bolatyn. Búginde atalǵan úılerden sý tolyǵymen shyǵarylsa da, daladan jaıylǵan qar sýy aýyl turǵyndaryn úreıde ustap otyr. Agenttik tilshisi atalǵan aýylǵa baryp, jaǵdaıdy óz kózimen kórip qaıtty.
Daladaǵy qar sýy óz aldyna, aýyl ishindegi qardyń tolyq shyǵarylmaǵany birden kózge tústi. Onyń sebebi de joq emes eken. Aýyl ákimi Baqythan Soltanbaı bıyl qar shyǵarý jumystaryna 55 mln teńge bólingenin aıtty. Bul – 108 kóshesi bar aýyl úshin az aqsha.
«Qys boıy jınalǵan qardy syrtqa shyǵarýǵa 55 mln teńge jetkiliksiz. Eń kemi degende jarty mlrd teńge qarjy qajet. Qolda bar qarjyǵa qar shyǵaryldy. Qoıandynyń mártebesi aýyl bolǵandyqtan bıýdjetten bólinetin qarjy da aýyldyq deńgeımen ólshenip úlestiriledi. Shyn máninde bul aýyl jyl ótken saıyn iri eldi mekenge aınalyp barady», - deıdi aýyl ákimi.
Úılerdiń sý astynda qalýynyń taǵy bir sebebi bar. Bertinge deıin úıler qalaı bolsa solaı salynyp, sý tasqynyna qarsy qaýipsizdik sharalary saqtalmaǵan.
«Kóptegen úıdiń irgetasy joq dese de bolady. Qurylys durys júrgizilmegen. Burynǵy sýaǵarlardyń ornyna da úı salynyp ketken. Keıin aýylishilik joldarǵa asfalt tóselse de sýaǵar qarastyrylmaǵan», - deıdi aýyl turǵyny Baqyt Alýaı.
Muny aýyl ákimi de joqqa shyǵarmaıdy.
«Bul aýyl áý basta ınfraqurylym erejesi saqtalmaı, júıesiz salynǵan. Birinshi úı turǵyzylyp, keıin jol paıda bolǵan. Jol úılerden bıik tur. Máseleniń ýshyǵýyna bul másele de sebep bolyp otyr», - deıdi ol.
Ne desek te, aýdan basshylyǵy men oblystyq tótenshe jaǵdaılar departamenti mamandary qol qýsyryp otyrǵan joq. Jedel shtab qurylyp, táýlik boıy kezekshilik ornatylǵan.
«Jedel shtabqa túsken ótinishterge der kezinde qulaq asyp, sý sorǵylaý jumystary jedel júrgizilip jatyr. Osy ýaqytqa deıin 80-ge jýyq ótinish tústi. Dese de, «qashan ótinish túsedi eken» dep kútpeı, aýyldyń barlyq kósheleri baqylaýǵa alynǵan. Búginde daladan jaıylǵan qar sýynan qaýip bar. Kúzde jer qabaty qatyp qalyp, sý áli kúnge deıin sińip úlgermeı jatyr. Saldarynan aýyl ishine kirýde. Búginde 100-ge jýyq aýlany sý basty», deıdi Tselınograd aýdany ákiminiń orynbasary Serik Ospanov.
Tselınograd aýdany tótenshe jaǵdaılar bóliminiń bastyǵy Sábıt Kenjebektiń málimetinshe, sý tasqynynyń aldyn alýǵa 21 tehnıka jáne 33 motopompa jumyldyrylǵan.
«Aýyr tehnıkalar arqyly sýdyń arnasyn buryp, motopompamen sý sorǵylaý jumystary úzdiksiz júrgizilýde. Jeke quramnan 92 maman tartyldy. Osy ýaqytqa deıin 80 myń tekshe metr qar sýy syrtqa shyǵaryldy. Sý kirgen úıler qappen qorshaldy. Qar sýynan áli qaýip bar. Jaǵdaıdy baqylaýda ustap otyrmyz», - deıdi ol.
Belgili bolǵandaı, 2004 jyly Qoıandy aýylynda 58 úı bolsa, búginde 5 myńǵa jýyqtaǵan. Aýyl ákimi usynǵan málimetke súıensek, qazir munda 25 myń adam turady. Aýyldyń ishki joly – 180 shaqyrym. Onyń 30 shaqyrymyna asfalt tóselgen.
Aıta ketsek, budan buryn Qoıandy aýylynyń turǵyndary sý tasqynyna baılanysty tótenshe jaǵdaı jarııalaýdy talap etip, joldy jaýyp tastaǵan edi.
