Qoıan jylynyń qorytyndysy: ShQO-da qandaı eleýli oqıǵalar boldy
2023 jyl da attaı zýlap óte shyǵypty. Osy 12 aıda Shyǵys Qazaqstan oblysynda túrli ózgerister, san alýan oqıǵalar boldy. Kazinform tilshisi sonyń ishindegi eleýli degenderin jyl sońynda taǵy bir eske alyp ótti.
Aımaq basshysy aýysty
Osy jyldyń maýsym aıynda óńirdi toǵyz jyl basqarǵan Danıal Ahmetovtyń ókilettiligi aıaqtaldy. 16 maýsymda Shyǵys Qazaqstan oblysy aýmaǵyndaǵy máslıhattar depýtattarynyń jınalysy ótti. Kún tártibinde óńir ákimin taǵaıyndaýǵa kelisim berý ǵana engizildi. Barlyǵy eki kandıdat usynylǵan. Olar – Qazaqstannyń Reseıdegi Tótenshe jáne Ókiletti Elshisi Ermek Kósherbaev jáne Shyǵys Qazaqstan oblysy ákiminiń orynbasary Darhan Sapanov. Kandıdattardy máslıhattardyń 153 depýtatyna Úkimet basshysy Álıhan Smaıylov tanystyrdy. Daýys berý qorytyndysy boıynsha: Ermek Kósherbaevqa – 117, Darhan Sapanovqa 36 depýtat daýys berdi. Sóıtip, oblys ákimi bolyp Ermek Bedelbaıuly taǵaıyndaldy.
Danıal Ahmetov áleýmettik jelidegi jeke paraqshasynda óńir halqymen qoshtasty. Óz sózinde ol shyǵysqazaqstandyqtarǵa baǵa jetpes eńbekteri men kúsh-jigeri úshin alǵys aıtty.
- Sizdermen jumys isteý men úshin úlken mártebe boldy. Prezıdentimiz Qasym-Jomart Toqaev aıqyndaǵan memlekettik saıasatty tıimdi iske asyrýdaǵy komandamnyń bir bóligi bolǵandaryńyzǵa qýanyshtymyn. Shyǵys Qazaqstan oblysy men jalpy respýblıkanyń órkendeýi úshin tabysty jumysty jalǵastyrýǵa yqpal etetinderińizge senimdimin. Aldaǵy ýaqytta da óńir turǵyndarynyń ıgiligi úshin tyń jobalar men ıdeıalardyń iske asyrylýyna shyn júrekten tilektespin!, - dedi D.Ahmetov.
Rıdder JEO-daǵy apattar
Byltyr kúzde alǵash ret apat shyqqan Rıdderdegi jylý elektr ortalyǵyndaǵy qıyn ahýal osy jyldyń basynda da jalǵasty. 19 qańtarda saǵat 06:54-te JEO-daǵy otynmen qamtamasyz etý tsehy órtense, 21 naýryzda eki qazandyqta órt shyqqan. Prokýratýranyń qadaǵalaý aktisi boıynsha «Rıdder jylý elektr ortalyǵy» AQ-ǵa 11 mln teńge aıyppul salynyp, jergilikti turǵyndardyń paıdasyna jylý tıisinshe jetkizilmegeni úshin 63 mln teńge óteldi. Jaz boıy JEO-da kúrdeli jóndeý jumystary júrgizilip, barlyq 6 qazandyq jóndeýden ótken.
Kúzde jańa jylytý maýsymy bastalǵanda jylý elektr ortalyǵy jeke menshikte emes, qalalyq ákimdiktiń kommýnaldyq balansynda boldy. Maýsym tynysh bastalyp kele jatyr edi, kenet ortalyqtaǵy BShM 2-niń kabeli úzilip qaldy. Alaıda jedel iske qosylǵan avtomatıkanyń arqasynda 2 saǵattan keıin qazandyq kómir otynyna aýystyrylyp, másele sheshimin tapty. Qazir JEO qalypty rejımde jumys istep tur.
Ájethanadaǵy qyzdar tóbelesi
Naýryz aıynda Óskemendegi «ADK River» oıyn-saýda ortalyǵynda kámeletke tolmaǵan qyzdardyń kolledjde oqıtyn qyzdy soqqyǵa jyǵyp jatqan vıdeosy tarady. Muqym qazaqstandyqtardyń jaǵasyn ustatqan sol oqıǵaǵa qatysty tergeý bastalyp, keıin is sotqa jetken. Belgili bolǵandaı, mektepte oqıtyn buzaqy qyzdar jábirlenýshiden 50 myń teńge talap etken.
Atalǵan is boıynsha 14 qyz tergeýge alynyp, tek úsh boıjetken aıyptalýshy dep tanyldy. Sot sheshimimen 2 sottalýshy 3 jylǵa bas bostandyǵynan aıyrylsa, úshinshi qyz 1 jylǵa bas bostandyǵynan shekteldi. Sondaı-aq jábirlenýshiniń paıdasyna 9 000 000 teńge somasynda moraldyq zııan óteldi.
Lenın eskertkishi qırady
Tamyz aıynda Shyǵys Qazaqstandaǵy Altaı qalasynda jóndelip jatqan Lenın eskertkishi qırap qaldy. Osyǵan baılanysty polıtseıler tergeý amaldaryn qolǵa alǵan. Keıin áleýmettik jelide belgisiz bireýdiń eskertkish turǵan qorshaýdyń syrtyna «Lenındi qaıtaryńdar!» dep jazǵan jazýynyń fotosýreti tarady. Tártip saqshylary oǵan izdeý jarııalaǵanymen taba almaı qoıdy. Arada bir aıdan astam ýaqyt ótkende Lenın eskertkishin jóndeýge aqsha bólgen Altaı aýdanynyń ákimi Ernar Mustafın óz erkimen qyzmetinen ketti.
Aıta keteıik, áli kúnge deıin eskertkish orny bos tur.
Eki aýdan ákimi saılandy
Qarashanyń 5-i kúni Altaı jáne Glýbokoe aýdandarynda ákim saılaýy ótti. Ákim bolýǵa barlyǵy 5 adam kandıdat bolǵan. Saılaý qorytyndysy boıynsha Altaı aýdanynyń ákimi qyzmetine Renat Qurmambaev kirisse, Glýbokoe aýdanynyń ákimi bolyp Eldar Týmashınov saılandy.
Jańa aýdandar quryldy
QR Prezıdenti Qasym-Jomart Toqaev maýsym aıyndaǵy Ulttyq quryltaı otyrysynda Shyǵys Qazaqstandaǵy eki aýdandy qaıta qalpyna keltirý qajettigi jaıly aıtqan. Tamyz aıynda oblystyq máslıhat depýtattary ShQO quramynda ákimshilik ortalyǵy Úlken Naryn aýyly bolatyn Úlken Naryn aýdanyn qurýǵa jáne jańa aýdandy Katonqaraǵaı aýdanynyń quramynan bólýge, sondaı-aq ákimshilik ortalyǵy Marqakól aýyly bolatyn Marqakól aýdanyn qurý jáne bul aýdandy Kúrshim aýdanynyń quramynan bólýge daýys berdi. Osylaısha, Katonqaraǵaı aýdanynyń ákimshilik ortalyǵy Úlken Naryn aýylynan Katonqaraǵaı aýylyna kóshiriledi.
Al jeltoqsannyń 28-i kúni Prezıdent jarlyǵymen Úlken Naryn jáne Marqakól aýdandary qurylyp, halyq qýanyshtan bórkin aspanǵa atty.
Mektepterge bomba qoıyldy
Óskemende osy jyldyń aqpan aıynda toǵyz kúnde mektepterge bomba qoıylǵany týraly 5 ret jalǵan habar tústi. Sonyń saldarynan oqýshylar el qatarly sabaq oqı almaı qaldy. Mysaly, 14 aqpanda 23 mektep oqýdy toqtatýǵa májbúr bolǵan.
ShQO Polıtsııa departamenti baspasóz qyzmetiniń málimetine súıensek, barlyq fakti boıynsha QR Qylmystyq Kodeksiniń 273-babymen (Terrorızm aktisi týraly kórineý jalǵan habarlaý) sotqa deıingi tergeý amaldary qolǵa alyndy. Alaıda qylmys jasaǵan adamdar sol kúıi anyqtalǵan joq. Osyǵan baılanysty sotqa deıingi tergeý toqtatyldy.
Bas ekolog ustaldy
Shyǵys Qazaqstannyń ekologııasy onsyz da ońbaı turǵany belgili. Al osy mańyzy zor salaǵa jaýapty eki birdeı sheneýnik ustalǵanda halyqtyń kúdigi odan saıyn qalyńdaı tústi. Áýeli qarasha aıynda ShQO Sybaılas jemqorlyqqa qarsy qyzmeti Ulttyq qaýipsizdik komıtetiniń oblystyq departamentimen jáne prokýratýramen birlesip, jasyryn tergeý áreketteriniń nátıjeleri boıynsha óńirlik Ekologııa departamenti basshysynyń orynbasaryn para aldy degen kúdikpen quryqtady. Keıin atalmysh departamenttiń basshysy qatty paıdaly qazbalardy barlaý kezinde qorshaǵan ortany emıssııalaýǵa ruqsat etkeni jáne jalpy qamqorlyǵy úshin kásipkerlik sýbektilerinen birneshe ret para alý boıynsha kúdikti dep tanylyp, tutqynǵa alyndy. Búginde eki is boıynsha da sotqa deıingi tergeý jalǵasýda.
Tehnıkalyq kópir salyndy
Kúni keshe Buqtyrma sý qoımasy arqyly ótetin tehnıkalyq kópirdiń qurylysy aıaqtaldy. Ol tehnıka, jabdyqtar men mamandardy jumys ornyna úzdiksiz jáne jedel jetkizýge múmkindik beredi.
Tehnıkalyq kópirdiń uzyndyǵy - 1153 metr, onda 13 qurylys alańy bar. Shyǵys Qazaqstan oblysynyń ákimi Ermek Kósherbaev kópirge baryp, qurylys jumystardyń barysymen tanysty.
«Kópir Memleket basshysynyń tapsyrmasy boıynsha salynyp jatyr. Ol logıstıkany, týrızmdi, shaǵyn jáne orta bıznesti damytýǵa sep bolady. Qazirdiń ózinde munda jaqyn mańdaǵy aýyldardyń turǵyndary jumys istep, jańa jumys oryndary ashylyp jatyr. Kópirdiń bárimiz úshin, birinshi kezekte shalǵaıdaǵy shekaralas aýdandarymyz Kúrshim, Zaısan jáne Tarbaǵataı aýdandarynyń turǵyndary úshin mańyzy zor. Bul strategııalyq jobany 2024 jyly laıyqty aıaqtaıtynymyzǵa senimdimin», - dedi Ermek Kósherbaev.
Búrkitshiler bas qosty
Qarasha aıynyń sońynda Shyǵys Qazaqstan oblysy Ulan aýdanynda «Shyǵys salbýryny - 2023» halyqaralyq festıvali ótti. Oǵan Qazaqstannan bólek Qytaı, Mońǵolııa, Reseı jáne Qyrǵyzstannan qatysýshylar keldi. Qazylar alqasy kórermenmen birge 40 búrkit pen 10 suńqardyń jáne ıt jarysy boıynsha 40 tazy tuqymdylardyń arasynan úzdikterdi anyqtady. Іrikteý kezeńinde jyrtqysh qustar 700 metr qashyqtyqtan ıesiniń shaqyrýymen ushyp, qyrandar shyrǵa salýdan synǵa tústi. Jartylaı fınalda qoıandardy erkin aýlaý boldy. Al fınal túlki aýlaýdan ótkizildi.
Qorytyndy baǵdarlamada ıesiniń shaqyrýymen qarshyǵanyń, suńqardyń, búrkittiń ushýy jáne ushqan kezde ıtelgini shyrǵaǵa salýy, búrkittiń túlki, qoıan aýlaýy, suńqar men qarshyǵanyń kógershin aýlaýy ótkizildi. Festıvaldiń taǵy bir ereksheligi – qazaqy tazylardyń 1000 metrge júgirýi jáne asaý jylqylardy qolǵa úıretý boldy. Týrnır jeńimpazdary men júldegerlerine kýboktar men aqshalaı syılyqtar tabystaldy.
