Qostanaılyqtarǵa kómek retinde BQO-dan 23 mln teńge aýdaryldy

ORAL. QazAqparat – Qostanaıda órtten zardap shekken turǵyndarǵa Batys Qazaqstan oblysynan gýmanıtarlyq júk jóneltildi, dep habarlaıdy QazAqparat tilshisi.

«AMANAT» partııasy «Jastar rýhy» jastar qanaty BQO fılıalynyń tóraǵasy Arhat Islamǵalıdyń málim etkenindeı, 8 qyrkúıek kúni júk kóligi Oral qalasynan jolǵa shyqty.

Onyń sózine qaraǵanda, 20 tonnalyq júk kóligine azyq-túlik, jyly kıim-keshek, jamylǵylar, gıgıenalyq qajetti zattar, oqýǵa qajetti quraldar tıeldi.

«Jeksenbi kúni Oral qalasy men oblystyń barlyq aýdanynda 14 gýmanıtarlyq kómekti qabyldaý pýnkti ashyldy. Barlyq deńgeıdegi máslıhat depýtattary, kásipkerler, oblys turǵyndary kómekterin aıamaı, qolushyn sozdy. Tamaq, kıim jetkilikti degennen keıin qarajatqa basymdyq berilip, «Aqjaıyq» qorynan Qostanaı oblysyna 23 mln teńge aýdaryldy. Oblystaǵy kásiporyn-mekemeler qyzmetkerleri, memlekettik qyzmetshiler, «AMANAT» partııasynyń músheleri bir kúndik jalaqylaryn aýdaryp, óz úlesterin qosty. Qajettiligine qaraı bul jumystar jalǵasyn tabady», dedi A.Islamǵalı.

Eske sala keteıik, budan buryn Qostanaı oblysynda tabıǵı apattan zardap shekkenderge BQO-dan kómek uıymdastyrylyp jatqanyn, qostanaılyqtarǵa qarajat jınaý úshin ortalyqtandyrylǵan esepshot ashylǵanyn jazǵan bolatynbyz.