Qostanaılyq eki oqýshy taǵam qaldyqtarynan bıoplastık jasap shyǵardy
Mekteptiń baspasóz qyzmeti taratqan aqparatqa súıensek, «Ǵylym álemin ashamyz» ǵaryshtyq zertteýler boıynsha XVІ Halyqaralyq ǵylymı jarysy bıyl alǵash ret onlaın rejımde ótti. Aıtýly dodada Qostanaı qalasyndaǵy Nazarbaev zııatkerlik mektebiniń 10-synyp oqýshylary Sánııa Ómirzaqova men Dılara Ýsembaeva I orynǵa ıe boldy. Jas ǵalymdar taǵam qaldyqtarynan plastıkalyq materıal jasap shyǵarýdyń jolyn anyqtaǵan.
«Bizdi ekologııa máseleleri alańdatady. Sondyqtan tabıǵı túrde ydyramaıtyn jasandy materıal – plastmassa qaldyqtarynyń mólsherin azaıtý joldaryn qarastyrdyq. Bir jyl ishinde ustazymyzben kóptegen tájirıbe ótkizip, nátıjesinde ósimdik taǵamdarynyń qaldyqtarynan jasalǵan bıoplastıkany oılap taptyq. Bul materıaldyń basty ereksheligi – topyraqta ózdiginen ydyrap, joq bolyp ketedi. Biz jańa materıaldyń fızıkalyq jáne hımııalyq quramyn anyqtap, ony jasap shyǵarýdyń tehnologııasyn da taptyq», - deıdi jas ǵalymdar.
Oqýshylardyń ǵylymı jetekshisi Natalıa Naýmenkonyń aıtýynsha, ósimdik qaldyqtarynan jasalǵan materıaldy tabýǵa baǵyttalǵan kóptegen tájirıbeler ótkizgen.
«Men osy joba týraly synypta aıtqanda Sánııa men Dılara asa qyzyǵýshylyq tanytty. Olardyń qulshynysyn birden baıqadym. Bıoplastıkti jasaý tehnologııasy boıynsha qolǵa alǵan taldaýlar bastapqyda birneshe ret sátsiz aıaqtalǵan bolatyn. Biraq olardyń qajyrly eńbegi nátıje berdi», – dedi ǵylymı jetekshi.
