Qostanaılyq bozbala ınternet arqyly SQO turǵynynyń 888 myń teńgesin qoldy etken

PETROPAVL. QazAqparat – Soltústik Qazaqstan oblysynyń turǵyny ınternet-alaıaqtyń arbaýyna túsip, 888 myń teńgesinen aıyryldy. Polıtseıler kúdiktini anyqtady, ol – Qostanaıdyń 18 jastaǵy turǵyny bolyp shyqty, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, naýryz aıynda Qyzyljar aýdanynyń polıtsııa bólimine Prıbrejnoe aýylynyń turǵyny aryzdanǵan. Er adam ınternet-alaıaqtyń arbaýyna túsken. Aıtýynsha, ǵalamtorda «Toyota Highlander» avtokóligin 1 mln teńgege sayp jatqan habarlandyrýdy kóredi. Tıimdi usynysty qalt jibergisi kelmeı, kólikti satyp alý úshin «satýshynyń» aıtýymen 350 myń teńge aldyn ala tólem jasaıdy.

Aýyl turǵyny 2020 jyldyń jeltoqsanynda aqshany jibergen, keıin túrli rásimderge aqsha qajet degen soń, ústinen qosyp taǵy aýdarǵan. Shyǵyn somasy 888 myń teńgeni quraǵan.

Atalǵan fakti «Alaıaqtyq» baby boıynsha Sotqa deıingi tergep-tekserýlerdiń biryńǵaı tizilimine engizilidi. Jedel-izdestirý is-sharalarynyń nátıjesinde kúdikti – Qostanaı qalasynyń 18 jastaǵy turǵyny ustaldy.

«Esterińizge salamyz: ǵalamtorda saýda jasaǵan kezde, saqtyq tanytqan jón. Kúmándansańyz, aldyn ala tólem jasaýǵa kelispeńiz. Alaıaqtardyń qurbanyna aınalýyńyz ábden múmkin. Ǵalamtor arqyly qarjy operatsııalaryn jasaǵan jaǵdaıda qyraǵylyq tanytýdy suraımyz», - deıdi Qyzyljar aýdanynyń polıtsııa bólimi bastyǵynyń mindetin atqarýshy Petr Klımov.

Sondaı-aq, polıtseıler qandaı jaǵdaı da, bógde adamdarǵa jeke jáne qarjylyq málimetterińizdi aıtpaýǵa, jeke qujattaryńyz ben bank kartalaryńyzdyń sýretterimen bólispeýge keńes beredi.