Qostanaıda jaıylymdyq jerlerdiń elektrondy kartasy jasaldy
Qostanaı óńirinde tsıfrlandyrý baǵdarlamasy arqyly «jeńiske tez jetýdiń» Jol kartasy jasaldy. Bastapqyda munda oblystaǵy 77 is-shara belgilendi. Keıinirek barlyq múmkindikterdi saralaı kele, Jol kartasyna taǵy da 53 shara qosylyp, jalpy atqarylatyn jobalar sany oblysta 130-ǵa jetti. Negizi, «Tsıfrly Qazaqstan» baǵdarlamasy boıynsha Qostanaı oblysy aýyl sharýashylyǵy men densaýlyq saqtaý salasynda pılottyq óńir sanalady. Qazir bilim berý, densaýlyq saqtaý, turǵyn úı-kommýnaldyq sharýashylyq, kólik, qaýipsizdik, ónerkásip, shaǵyn jáne orta bıznes jáne agroónerkásip kesheni salalarynda josparlanǵan álgi 130 jobanyń 33-i júzege asyryldy.
«Qyrkúıek aıynda Qoldau.kz veb-platformasy arqyly jaıylymdyq jerlerdiń elektrondy kartalaryn jasaýǵa múmkindik aldyq. Qazirgi ýaqytta óńirde 4,2 mln gektar shabyndyq alqap bar. Sonyń 251,3 myń gektary tsıfrlandyrý baǵdarlamasyna kiriktirildi. Aýyl sharýashylyǵy mınıstrligimen birigip, 2022 jylǵa deıin 6 smart-ferma, jer ıgerý baǵytynda 5 tsıfrly ferma qurý josparda bar. Aldaǵy ýaqytta aýdandar men qalalardyń ákimdikterimen keńesip, tsıfrlandyrý jobalaryn iske asyrýǵa nıetti sharýa qojalyqtarymen jumys isteımiz», - dedi Tımýr Beısembaev.
Qostanaı oblysy respýblıkada agroónerkásip kesheninde kósh bastap tur. Aımaqta Elbasynyń bıylǵy Joldaýynda aıtylǵan mindetter men «Tsıfrly Qazaqstan» memlekettik baǵdarlamasyn júzege asyrý boıynsha jer qatynastary salasyn tsıfrlandyrý jumystary júrgizilip keledi.
Jer óńdeýde, qus sharýashylyǵynda, sút jáne et fermalarynda «aqyldy» tehnologııalar engizilip, ol aýyl sharýashylyǵy taýarlaryn óndirýshilerge shyǵyndy azaıtyp, ónimdilik pen paıda ákele bastady. Oblystaǵy tsıfrly tehnologııalar engizgen «Terra», «Sadchıkovskoe», «Jas qanat», «Qarqyn», «Zarechnoe», «Troıana» jaýapkershiligi shekteýli seriktestikteri men «Terra» sharýa qojalyǵy sekildi 7 agrofırmanyń tıimdiligi jyldam artyp keledi.
Oblys óndirisindegi Sokolov-Sarybaı ken óndirý birlestigi, «Varvarınskoe», «Qostanaı mıneraldary», «Baıan sulý» AQ, «Prombaza-7» JShS sekildi iri kásiporyndar óndiriske Indýstrııa 4.0 pen tsıfrlandyrý elementterin qosty. Máselen, Sokolov-Sarybaı ken óndirý birlestiginiń Qashar kenishinde ótken jyldan beri jumys «aqyldy karer» tehnologııasymen júredi. Qazir Qorjynkól jáne Sokolov-Sarybaı kenishteri de jumysty barynsha jeńildetetin, ýaqyt únemdeıtin osyndaı ozyq tehnologııaǵa kóship jatyr.