Qostanaıda teledıdar shyǵaratyn zaýyt salynady
Búgin Qytaı Halyq Respýblıkasynyń NKS Corporation Limited kompanııasy jetekshilerine oblystyń ınvestıtsııalyq tartymdylyǵy jáne ınvestorlardy memlekettik qoldaý sharalary tanystyryldy. Jıynǵa oblys basshysy Arhımed Muhambetov pen NKS Corporation Limited kompanııasynyń vıtse-prezıdenti Lı Djın qatysty.
Sonymen, qytaılyq kompanııa Qostanaı qalasyndaǵy Indýstrııalyq aımaqta teledıdar shyǵaratyn zaýyt salý jobasyn qarastyrýda. Olar bastapqy kezeńde 20 mln dollar ınvestıtsııa salýdy josparlap otyr. Atalǵan zaýyttyń óndiristik qýaty jylyna 600 myń dana bolmaq. Aldaǵy ýaqytta 500 shaqty jumys orny ashylýy múmkin.
«Qostanaı oblysy - Qazaqstandaǵy biz ınvestıtsııa salǵaly otyrǵan alǵashqy óńir. Qostanaı Reseı Federatsııasymen irgeles, sondyqtan Keden odaǵynyń múmkindikteri esepke alynyp otyr. Bir jaǵynan TMD naryǵyna shyǵýǵa da qolaıly. Josparymyz boıynsha, zaýyttyń jyldyq saýda kólemi 400 mln dollardaı bolady dep kútiledi. Ónim saýdasynyń maqsatty naryǵy TMD elderi bolyp otyr», - dedi Lı Djın.
Jıynda qytaılyq meımandarǵa Qostanaı oblysy jaıynda jan-jaqty aqparat berildi. Geografııalyq, áleýmettik, ekonomıkalyq jaǵdaıymyz jáne Indýstrııalyq aımaqtyń jumysy, atqarylǵan, taıaý keleshekke qurylǵan aýqymdy josparlar tanystyryldy.
«Qostanaı - agrarly óńir, eldiń egin sharýashylyǵynyń tórtten birin qamtıdy. Investorlarmen áriptestik ornatý, birlese jumys isteý jaǵynan tájirıbemiz bar. Buǵan deıin de qytaılyq kompanııalarmen birlesip óndiristik jelilerdi iske qostyq. Áriptestik nátıjesiz emes. Syrtqy naryqqa shyǵý múmkindigine ıemiz, ásirese Reseımen kórshiles ornalasýymyz eksporttyq jaǵynan tıimdi. Bastysy, korporatıvtik salyq kólemi bul eldikimen birdeı. Al sizderdiń kompanııalaryńyz týraly jaqsy habardarmyz. Ónimdilik 600 mln dana bolsa, elimizdi de, Reseı naryǵyn da qamtı almaqpyz», - dedi oblys ákimi Arhımed Muhambetov.
Aımaq basshysy qytaılyq kompanııa jetekshilerine ózara áriptestik qatynasqa qashanda daıyn ekendigin jetkizdi. Al meımandar, bári jospardaǵydaı bolsa, keler jyly-aq zaýytty iske qosýǵa yqylas tanytty. Tek zaýyt qurylysyn qaı tarap mindetine alatynyn kompanııa óz ishinde keńespek, bul jumystar birlesken túrde júzege asýy da ábden múmkin.
Eske sala keteıik, qytaılyq kompanııa basshylyǵyn oblys ákiminiń orynbasary Meıirjan Myrzalıev bastaǵan delegatsııa 16-21 shildede Beıjiń qalasyna jasaǵan issapary barysynda Qostanaıǵa shaqyrǵan bolatyn.
