Qostanaıda sheneýnik merdigerden 9 mln teńge alyp jatqanda ustaldy

QOSTANAI. KAZINFORM — Qarjylyq monıtorıng agenttigi Qostanaı oblysynda densaýlyq saqtaý obektilerin salý kezinde zańsyz syıaqy alý faktisi boıynsha sotqa deıingi tergeý bastady. 

Avtorlyq qadaǵalaý tobynyń basshysy bopsalaý arqyly oryndalǵan jumys jáne paıdalanýǵa berý aktilerine kedergisiz qol qoıǵany úshin «Aýyldyq densaýlyq saqtaýdy jańǵyrtý» ulttyq jobasy sheńberinde dárigerlik ambýlatorııa salatyn kompanııanyń bas ınjenerinen 9 000 000 teńge mólsherinde zańsyz syıaqy alǵan.

Tergeý barysynda kúdikti qolma-qol aqsha alý kezinde ustaldy.

Zańsyz syıaqy mólsheri kórsetilgen obektilerdi salý qunynyń jalpy somasynyń 1% — quraıdy.

Sotqa deıingi tergeý jalǵasyp jatyr. 

QR QPK 201-babynyń talaptaryna sáıkes ózge de málimet jarııalanbaıdy.