Qostanaıda respýblıkalyq oqytýshylar baıqaýy ótti
Igi sharany Shaısultan Shaıahmetov atyndaǵy «Til-Qazyna» ulttyq ǵylymı-tájirıbelik ortalyǵy uıymdastyrdy. Eki kúnge sozylǵan bilim saıysyna eldiń ár óńirinen 14 oqytýshy keldi. Olar - ózge ult ókilderine qazaq tilin oqytyp júrgen tájirıbeli ustazdar. Synǵa túsken oqytýshylar baıqaýynyń alǵashqy kúni qatysýshylardyń árqaısysy A.Baıtursynov atyndaǵy ýnıversıtet qabyrǵasynda ashyq sabaq ótkizdi. Saıys ekinshi kúni «Mıras» mádenıet úıinde jalǵasty. Munda ustazdar ózderi aldyn ala daıyndap ákelgen elektrondy ádistemelik quraldarymen tanystyryp, kópshilik aldynda qazaq tilin oqytýdyń zamanaýı ári tıimdi úlgilerin kórsetti. Sondaı-aq baıqaý sharty boıynsha berilgen pedagogıkalyq-psıhologııalyq jaǵdaıattar boıynsha tapsyrmalardy oryndap, qazylar qoıǵan saýaldarǵa jaýap berdi.
Qazylar alqasynyń tóraǵasy, fılologııa ǵylymdarynyń doktory Jandos Smaǵulovtyń aıtýynsha, elimizdiń ár túkpirinen kelgen til úıretýshiler baıqaý barysynda ózara tájirıbe almasady. Ustazdyq tájirıbesin baıytyp, ádistemelik qorjynyn molaıtady.
Baıqaý qorytyndysy boıynsha, Qaraǵandy oblystyq tilderdi damytý ortalyǵynyń oqytýshysy Dınara Qýanbaeva bas júldeni jeńip aldy. Al birinshi oryndy Qostanaı aýdandyq tilderdi damytý ortalyǵynyń oqytýshysy Toty Aıtmaǵambetova ıelendi. Ekinshi oryn «Oral-Servıs» tehnologııalyq kolledji qazaq tili men ádebıeti pániniń oqytýshysy Ádilhan Sultanovqa buıyrsa, qyzylordalyq Perızat Іzbasarova men almatylyq Sholpan Ábdilda úshinshi oryndy ózara bólisti.
Uıymdastyrýshylardyń sózinshe, Ahmet Baıtursynuly atyndaǵy oqytýshylar baıqaýy elimizdiń ár óńirinde jyl saıyn dástúrli túrde ótip turady.
