Qostanaıda órtengen úıden eki adamnyń máıiti tabyldy

QOSTANAI. QazAqparat – Qostanaıda Abaı dańǵylynda eki qabatty turǵyn úıde órt boldy, dep habarlaıdy QazAqparat.

Órt sóndirýshiler kelgenshe jalyn búkil úıge jaıylyp, 250 sharshy metr aýmaqty sharpyǵan.

Úıdiń shatyry, turǵyndardyń zattary janyp ketken.

«Órt saldarynan kórshiles eki qabatty jeke turǵyn úıdiń shatyry men tireýishteri de jartylaı janyp ketken, 10 sharshy metr aýmaq zardap shekti. Qutqarýshylar órtti 01:15-te oqshaýlap, jalynnyń kórshiles turǵyn úılerge taraýyna jol bermedi. Saǵat 02:26-da órt sóndirildi. Órt bolǵan jerden 1972 jáne 1984 jyly týǵan eki er adamnyń máıiti tabyldy», - dep habarlady oblystyq TJD.

Qazir zerthana mamandary oqıǵanyń mán-jaıyn tekserip jatyr.

Órttiń shyǵý sebebi anyqtalýda.