Qostanaıda kommýnaldyq HQKO ashylady
Oblystyq Tsıfrlandyrý, memlekettik qyzmet kórsetý jáne muraǵattar basqarmasynyń basshysy Azamat Qashıev bergen aqparatqa saı, 2021 jyly oblystyń 7 aýdanynda Qostanaıdaǵy úlgimen «109» Biryńǵaı baılanys ortalyqtary ashylǵan.
«Turǵyndarǵa memlekettik mekemelermen jáne kommýnaldyq qyzmettermen ózara árekettesý úshin yńǵaıly servıs usynyldy. Ortalyqtardyń áleýmettik paraqshalary belsendi júrgizilýde. Onda turǵyndarǵa mektepterdegi sabaqtardyń toqtatylýy týraly, tirshilikti qamtamasyz etý qyzmetteriniń (sý, elektr qýaty, jylý, gaz) apattyq jáne josparly ajyratylýy, jol jóndeý jumystary týraly ózekti jáne basqa da aqparat qoljetimdi. Búginge deıin baılanys ortalyqtaryna 300 myń qońyraý túsken», - dedi A. Qashıev.
Sondaı-aq aǵymdaǵy jyly halyqtyń kommýnaldyq qyzmettermen ózara is-qımyl protsesterin avtomattandyrýǵa baǵdarlanǵan, tabıǵı monopolııalar sýbektileri qyzmetiniń ashyqtyǵyn arttyrýdy, tóreshildik pen sybaılas jemqorlyq táýekelderin boldyrmaýdy qamtamasyz etetin «iQala» qalalyq qyzmetter ortalyǵyn (kommýnaldyq HQKO) ashý josparlanýda.
«Qostanaı oblysynda búgingi kúni monopolıstermen kommýnaldyq qyzmet kórsetýge shart jasasý, tehnıkalyq sharttar men basqa da qujattar berý protsesi kózbe-kóz qatysýdy talap etedi jáne birneshe kúnnen birneshe aıǵa deıin sozylýy múmkin. Sonymen qatar qyzmet kórsetýdiń jalpy protsesin túsinbegendikten, monopolısterdiń keńselerin aralaý qajettiligi týady. Ortalyqty qurýdyń maqsaty – ınnovatsııalyq tásildi engizý arqyly qala turǵyndarynyń turǵyn úı-kommýnaldyq sektor uıymdarynyń qyzmetterin alýyn jeńildetý», - dep qorytty A. Qashıev.
