Qostanaıda balalarǵa arnalǵan Smart ortalyq ashylmaq
Oblys ákimi Arhımed Muhambetovtiń tóraǵalyǵymen ótken otyrysqa aýdan, qalalardyń ákimderi qatysty. Aldymen, oblys basshysynyń orynbasary Marat Júndibaev «Rýhanı jańǵyrý» baǵdarlamasynyń Qostanaı oblysynda iske asý barysy týraly baıandama jasady. Onyń aıtýynsha, 2017 jyly baǵdarlama aıasynda 24 joba, 2,7 mlr teńgege 339 is-shara uıymdastyryldy.
«Bıyl 131 joba josparlanǵan. Onyń sheńberinde 802 is-shara ótkiziledi. Úsitimizdegi jyldyń birinshi toqsanynda «Rýhanı qazyna» kishi baǵdarlamasy sheńberinde bir joba men 79 is-shara aıaqtaldy. Sonyń arqasynda mektep murajaılarynyń sany kóbeıip, týrıstik-ólketaný baǵytyndaǵy úıirmeler jumys isteı bastady. Atalǵan baǵdarlama boıynsha bıyl mamyr aıynda Qostanaı oblystyq tarıhı-ólketaný murajaıynda «Rýhanı jańǵyrý» atty jańadan ekspozıtsııa zaly ashyldy. Sondaı-aq, «Atameken» kishi baǵdarlamasyn iske asyrýǵa eki júzden astam bıznes ókili jumyldyryldy. Metsenattardyń qarajaty esebinen bıylǵy jyldyń birinshi toqsanynda oblysta jalpy quny 172,2 mıllıonǵa 21 IT-tehnologııa kabıneti ashyldy. Memleket basshysynyń tapsyrmasyn oryndaý úshin jáne básekege qabiletti jastardy tárbıeleý maqsatynda jyldyń sońyna deıin árbir qala men aýdanda metsenattardyń demeýshiligimen taǵy bir IT-synybyn ashýdy usynamyn. Qostanaı jáne Rýdnyı qalalarynyń turǵyn sanyn eskere otyryp, eki synyptan ashýǵa bolady», - dedi Marat Júndibaev.
Arhımed Muhambetov bul usynysty qoldap, hattamaǵa engizýdi tapsyrdy. Buǵan qosa ákim «Rýhanı jańǵyrý» baǵdarlamasynyń aıasynda ótetin is-sharalardyń sanyna emes, sapasyna, mazmunyna tereńirek úńilý kerektigin eskertti.
«Jýyrda Arqalyq, Taran aýdany men Lısakov qalasyna jumys saparymen bardym. Alaıda, «Rýhanı jańǵyrý» baǵdarlamasy týraly materıaldardy kórmedim. Ár mýzeıde baǵdarlama týraly shaǵyn materıal nemese shaǵyn burysh bolýy kerek. Eskirgen aqparattardy jańartyp, úlgili mysaldardy kóbirek nasıhattaǵan durys. Mysaly, bizdiń oblysymyzda Qazaqstannyń kıeli oryndarynyń tizimine engen qanshama nysan bar. Ol jerler qaıta jańǵyrtý jumystarynan soń tamasha keıipke endi. Keıki batyrdyń kesenesi, Altynsarınniń mavzoleıi, Shaqshaq Jánibektiń eskertkishi, taǵysyn taǵylar. Barlyq aýdan, qala osyndaı qundy jádigerlerimizben maqtanyp, jas urpaq onyń tarıhyn bilýi kerek. IT tehnologııalar kabınetin ashý máselesine kelsek, usynysty qoldaımyn. Ázirge, 2018 jyly 43 kabınet ashamyz. 2019, 2020 jyldary kabınetterdiń sany artýy kerek. Demeýshiler qarajatyn tartý arqyly kabınetterdi qajetti qurylǵylarmen qamtamasyz etemiz», - dedi ol.
Selektorlyq otyrysta Amangeldi aýdanynyń ákimi Nurjan Ótegenov «Rýhanı jańǵyrý» baǵdarlamasynyń aýdanda oryndalýy týraly baıandama jasady. Amangeldilikter baǵdarlamany júzege asyrýdy byltyr Baıǵabyl aýylynda bastaǵan.
«2017 jyly Baıǵabyl aýylynda «Jańǵyrý kóktemi» atty jerlester forýmyn uıymdastyrdyq. Forým aıasynda aýyldyń eki qorymy qorshaldy. Aýyl kásipkerligin damytý boıynsha dóńgelek ústel ótti. Jerlesterimizdiń qatysýymen Úrpek pen Qarasý aýyldarynda balalar oıyn alańy ashyldy. Mádenıet salasynda jetistikke jetken jerlesterimiz elge kelip, kontsertik baǵdarlamalar uıymdastyryp, halyqty rýhanı baıytsa, densaýlyq saqtaý salasyndaǵy jerlesterimiz aýdandyq aýrýhanada naýqastardy tegin qarap, emdep, keńes berdi. Jerlesterimizben rýhanı baılanysty nyǵaıta túsý úshin qazirgi tańda Astana, Almaty, Aqtóbe, Qaraǵandy qalalarynda turyp jatqan amankeldilik týmalardyń basyn qosyp, «Týǵan jerge týyńdy tik» atty forým ótkizdik. QR halyq ártisi Ánýar Boranbaevtyń týǵanyna 70 jyl tolýyna oraılastyrylǵan is-sharalar aýdanymyzda keńinen atap ótildi», - dedi aýdan ákimi Nurjan Ótegenov.
Amangeldi aýdanynda oqýshylarǵa sandyq tehnologııa negizderin úıretý maqsatynda demeýshiler qarajaty esebinen 8 mln 430 myń teńgege tsıfrlyq tehnologııalar kabıneti ashyldy.
Jıynda belgili bolǵandaı bıyl Qostanaı qalasynda balalarǵa arnalǵan «Smart City» ortalyǵy ashylady. Qazirgi kúni Smart ortalyǵynyń ornalasatyn jeri anyqtalǵan. Joba aıasynda balalar bizdiń elimizden basqa, TMD aýmaǵynda keń taraǵan noý-haýlarmen tanysyp, ozyq ınnovatsııany meńgeretin bolady.
