Qostanaı teatry Túrkistanda «Muńmen alysqan adam» dramasyn sahnalady
Qoıylymdy shyǵarma avtory, belgili jazýshy-dramatýrg, Qazaqstannyń eńbek sińirgen qaıratkeri Joltaı Álmashuly men Túrkistan oblysy ákiminiń orynbasary Málik Otarbaev, oblystyq Mádenıet jáne tilderdi damytý basqarmasynyń basshysy Nurdáýlet Erkinuly men zııaly qaýym ókilderi, qala turǵyndary men jastar tamashalady.
Aıta keteıik, búgingi kúnniń taqyrybyn qozǵaıtyn dramada XX ǵasyrdyń bas kezindegi saıası jaǵdaıǵa baılanysty taǵdyr tálkegine ushyrap, elden kóship, Frantsııa topyraǵynan bir-aq shyqqan qazaq otbasynyń taǵdyry beınelenedi. Seksenniń seńgirine shyqqan Asan qart týǵan jerin saǵynyp, táýelsiz Qazaq eline jetkenshe asyǵady. Al, balalary onyń ótinishin oryndaı qoımaıdy. Úlken uly Marat jeke kásibi men jyly ornyn tastap, ózine beıtanys ólkege qonys aýdarýdan úzildi-kesildi bas tartady. Alaıda, atasynyń jan-dúnıesin tereń túsingen Eljan «qaıtsem de ákemdi týǵan jerine aparamyn» dep sheshim qabyldaıdy. Dramada baýyrlar, áke jáne otbasy arasyndaǵy tartysty shıelenis kórsetiledi. Keıipkerler sózderi nanymdy ári oqıǵa mazmundy bolǵandyqtan, kórermendi beıjaı qaldyrmady. Qarııanyń týǵan jeri Túrkistan jerine oralǵannan keıingi sátter erekshe tebirenis syılady.
Drama sońynda Túrkistan oblys ákiminiń orynbasary Málik Otarbaev tarıhı mekenge taban tiregen qostanaılyq teatr ujymyna alǵysyn bildirip, qoıylymnyń avtory Joltaı Álmashuly men teatr basshysy Sabyráli Baıǵazyulyna alǵys hat pen oblys basshysyna syı-sııapat tabystady.
