Qostanaı oblysynyń ındýstrııalyq aımaǵyna temirjol salynady

QOSTANAI.QazAqparat – Qostanaıdaǵy ındýstrııalyq aımaqqa temirjol tartý jumysy aıaqtalyp qaldy. Bul týraly oblys ákimdiginde ótken jıynda Kásipkerlik jáne ındýstrııalyq-ınnovatsııalyq damý basqarmasynyń basshysy Oljas Saparbekov aıtty, dep habarlaıdy QazAqparat tilshisi.

Qostanaı oblysynda jeke kásipkerlerdi qoldap, otandyq jáne sheteldik óndiris nysandarynyń jumys isteýine qolaıly jaǵdaı jasaý ındýstrııalyq aımaq ashylǵan bolatyn . Bul aýmaqta jyl saıyn ártúrli óndiris oshaǵy boı kóteredi. Endi kásipkerlerdiń jumys tıimdiligin arttyrý úshin ındýstrııalyq aımaqqa temirjol tartylmaq.

«Bıyl aýqymdy 3 joba aıaqtalady. Sonyń biri – Qostanaı qalasyndaǵy ındýstrııalyq aımaqqa temirjol salý. Oǵan jergilikti bıýdjetten 250,8 mln teńge qarastyrylǵan. Buǵan qosa Fedorov aýdany Kopychenka aýylyndaǵy «Prombaza-7» JShS sýmen jabdyqtaý qurylysyn aıaqtaıdy. Úshinshi joba – Arqalyq qalasyndaǵy «Torǵaı Et» JShS mal sharýashylyǵy keshenine elektr jáne sýmen jabdyqtaý júıesin salý. Oǵan jergilikti bıýdjetten 137,5 mln teńge bólindi», - deıdi Kásipkerlik jáne ındýstrııalyq-ınnovatsııalyq damý basqarmasynyń basshysy Oljas Saparbekov.

Jańa bıznes-ıdeıalardy iske asyrý úshin osy jyly oblystyń jas kásipkerlerine 30 mln teńge berilgen. 103 kásipker jobalaryn tanystyryp, baıqaýǵa qatysqan. Osy maqsatta oblystyq máslıhattyń sessııasynda qosymsha 100 mln teńge bólinetin bolyp sheshildi.

Sonymen qatar, Amangeldi, Jangeldın, Qamysty, Qarabalyq, Meńdiqara jáne Naýryzym aýdandarynda bıznes jobalar joqtyń qasy. Osyǵan baılanysty Oljas Saparbekov atalǵan aýdandardyń ákimderine belsene atsalysý qajettigin aıtty.