Qostanaı oblysynyń eldi mekenderin gazdandyrýǵa 13 mlrd teńge jumsalady
«Qostanaı óńiriniń eldi mekenderin gazdandyrýǵa 13 mlrd teńge jumsalady. Oblys ákimdigi «QazTransGaz» aktsıonerlik qoǵamymen memorandýmǵa qol qoıdy. Osy kelisimniń nátıjesinde ótken eki jyl ishinde segiz eldi mekenge gaz berildi. Onda 30 myń adam turyp jatyr. Taıaý eki jylda 23 myń adam turatyn taǵy tórt eldi mekenge gaz beriledi», - dedi Qostanaı oblysynyń ákimi Arhımed Muhambetov búgin Astanada Ortalyq kommýnıkatsııalar qyzmetinde ótken brıfıngte.
Oblys basshysy sonymen birge, memlekettik-jekemenshik áriptestik sheńberinde óńir aýmaǵynda 17 mlrd teńgeniń jobalary iske asyrylyp jatqanyn tilge tıek etti.
«Aımaqta 17 mlrd teńge somasyna 45 memlekettik-jekemenshik áriptestik sharty jasaldy. Jalpy ınvestıtsııa somasy 27 mlrd-tan astam teńgege 68 joba iske asyrylýda», - deıdi ol.
Eske sala ketsek, atalmysh brıfıngte Arhımed Muhambetov Qostanaı oblysynda jyl basynan beri avtokólik qurastyrý 15,7 paıyzǵa artqanyn aıtty. Onyń sózine qulaq assaq, osyndaı ósimmen Qostanaı oblysy 2023 jylǵa qaraı jylyna 60 myń avtokólik shyǵarýdy kózdep otyr.
Sondaı-aq, aımaq basshysy óńirdegi agroónerkásiptik keshen salasyna tsıfrlyq tehnologııalar qalaı engizilip jatqanyn aıtyp berdi.
