Qostanaı oblysynyń «altyn jastary» anyqtaldy
Jastar jylynyń oblystaǵy qorytyndy jıynyna aımaq basshysy Arhımed Muhambetov qatysty. Shara barysynda Qostanaı oblysynyń Altyn kitabyna esimderi engen jastar marapattaldy.
«Táýelsizdik jyldary Elbasy talaı jarqyn istiń bastamashysy, tolaǵaı tabystarǵa jetýdiń úlgisin kórsetti. Uly Dala eliniń shekarasyn bekitip, básekege qabiletti, álem moıyndaǵan memleket retinde qalyptastyrdy. Ult Kóshbasshysy Qazaqstannyń irgeli el bolýyna jastardyń ornyn aıryqsha atap keledi. Oǵan dálel – bıylǵy jyl Jastar jyly bolyp jarııalandy. Mamyr aıynda bizdiń oblysymyzda Qazaqstan men Reseı jastary bas qosqan forým ótip, oǵan Memleket basshysy Qasym-Jomart Toqaev arnaıy qatysty. Qazaqstan Prezıdenti sol basqosýda barlyq memlekettik organdardyń jastar bastamasyna zor qoldaý kórsetýge shaqyrǵan edi.
Bizdiń óńirimizde de Jastar jyly zor tabyspen aıaqtalyp otyr – 590 jas baspanaly boldy. Memlekettik turǵyn úı qurylysy jáne kásipkerlikti qoldaý baǵdarlamalary aıasynda olardyń 101-i kóp balaly otbasy, 65-i muǵalim, 118-i óńirimizge jumysqa shaqyrylǵan dáriger mamandar. Budan bólek, tegin kásibı-tehnıkalyq bilim, jeke bıznesin ashýǵa jáne startap-jobalardy qoldaý boıynsha aýyz toltyrarlyq jumystar atqaryldy.
Jastar arasynda basty másele – jumyspen qamtý. Nátıjeli jumyspen qamtý jáne jappaı kásipkerlikti damytýdyń «Eńbek» baǵdarlamasymen 8 myń qostanaılyqqa jumys orny ashyldy. «Dıplommen – aýylǵa» baǵdarlamasy júzege asyrylǵaly óńirdiń eldi mekenderine 4 myńnan astam jas maman eńbek etýge bardy. Olarǵa baspana jáne kótermeaqy retinde 6 mlrd teńge kóleminde qarajat berildi», - dedi oblys basshysy quttyqtaý sózinde.
Arhımed Muhambetovtiń sózinshe, oblys jastary únemi jańashyldyq bastamalarymen alda keledi. Olardyń ıdeıalaryn qoldaý maqsatynda aımaǵymyzdyń ár óńirinde jastar resýrstyq ortalyǵy jumys isteýde. Úkimettik emes uıymdarmen birlesip, 106 jobany júzege asyryp keledi. Respýblıkalyq «Jas kásipker», «Jas A» bastamalary boıynsha 200-den astam qostanaılyqtyń jobasy 135 mln teńgege qarjylandyrylǵan.
Óńirimizdegi 8 joǵary oqý orny men 35 kolledjde 43 myńnan astam stýdent bilim alýda. Innovatsııalyq tehnologııa, dýaldyq bilim berý, joǵary kásibı professorlardy shaqyrýmen qatar, shákirtterdiń jaıly orynda turýyna da kóp kóńil bólinip keledi. Aıtalyq, Tuńǵysh Prezıdenttiń «Bes áleýmettik bastama» baǵdarlamasyn júzege asyrý aıasynda Akademık Ó.Sultanǵazın atyndaǵy Qostanaı memlekettik pedagogıkalyq ýnıversıtetinde jataqhana salynyp jatyr. Budan bólek, JOO men kolledj stýdentterine arnap taǵy 4 jataqhana salý josparlanyp otyr.
Arhımed Muhambetov elimizdiń sport tarıhynda jarq etip kórinip kele jatqan grek-rım kúresinen halyqaralyq dárejedegi sport sheberi Tamerlan Shadýkaevqa 2 bólmeli páterdiń kiltin tabystady. Tamerlan – 2016 jyly Frantsııada ótken jastar arasyndaǵy álem dodasynyń jeńimpazy, bıyl Qytaıda ótken eresekter arasyndaǵy Azııa chempıonatynyń jáne Vengrııada ótken álem chempıonatynyń qola júldegeri. 2020 jyly ótetin Olımpıadaǵa qatysýǵa úmitker. Al chempıondy baptaǵan – grek-rım kúresinen oblysymyzdyń aǵa jattyqtyrýshysy Serik Baıjanovqa 1 mıllıon teńge berildi.
Sonymen, Oblystyń «Altyn kitabyna» esimderi engen jastar tómendegideı:
«Bilim jáne ǵylym salasyndaǵy jetistikteri úshin» – Nurymjan Mılaqatov, Sh.Ýálıhanov atyndaǵy Áýlıekól orta mektebi dırektorynyń tárbıe isi jónindegi orynbasary. Bıyl Shymkent qalasynda ótken «Zamanaýı oqytý ádisteri» atty HІ halyqaralyq ǵylymı-praktıkalyq konferentsııa aıasynda ótken baıqaýda bas júlde – avtokólik ıegeri;
«Sporttaǵy jetistikteri úshin» – Tursynaı Qabyl, halyqaralyq dárejedegi sport sheberi, paýerlıftıngten Azııanyń 2 dúrkin chempıony, álemdik chempıonattardyń júldegeri. Azııa rekordshysy, «Qazaqstannyń 100 jańa esimi» jobasyna qatysýshy;
«Jýrnalıstıka salasyndaǵy jetistikteri úshin» – Margarıta Ivanova, QOSTANAI telearnasynyń jýrnalıst-redaktory, dıktor, baǵdarlama avtory, telejúrgizýshi;
«Jastar kásipkerligi men Startup jobalardy damytýǵa qosqan úlesi úshin» – Aıbek Tańatbaev, jas kásipker, «Berdiqaz» kásipornynyń dırektory, Amangeldi aýdany;
«Memlekettik qyzmetti damytýǵa qosqan úlesi úshin» – Natalıa Mýrsalına, Qostanaı oblystyq bilim basqarmasynyń bas mamany, «Úzdik memlekettik qyzmetshi - 2019» respýblıkalyq konkýrsynyń jeńimpazy;
«Ónerkásip jáne agroónerkásip keshenin damytýǵa qosqan úshin» – Batyr Ospanov, «SaryarqaAvtoÓndiris» JShS jáne «AgromashHoldıng KZ» AQ kólik qurastyrýshy kásipornyndaǵy jastar isi jónindegi komıtet tóraǵasy;
«Jas batyrlar» nomınatsııasy – Alekseı Sygýchov, Krasnogor boksıt keni ekskavator mashınısiniń kómekshisi. 2019 jyly 4 jasar aýyr naýqas balaǵa baýyr donory boldy;
«Densaýlyq salasyna qosqan úlesi úshin» – Batyrhan Ysmaıylov, M.Qarabaev atyndaǵy týberkýlezge qarsy shıpajaıynyń ftızıatr dárigeri, Meńdiqara aýdanynda salamatty ómir saltyn qalyptastyrý baǵytynda 2 joba júzege asyrdy;
«Volonterlik baǵytynda qosqan úlesi úshin» – Marııa Zıývanova, Rýdnyı qalasyndaǵy «NewRud» jastar qoǵamdyq birlestiginiń tóraıymy, «Shag navstrechý» jastar resýrstyq ortalyǵynyń jetekshisi;
«Memlekettik jastar saıasatyn damytýǵa qosqan úlesi úshin» – Abaı Dúısekov, «JasStar» qoǵamdyq birlestiginiń tóraǵasy, Qostanaı oblystyq Jastar isi jónindegi keńestiń múshesi;
«Mádenıet jáne óner salasyndaǵy jetistikteri úshin» – Anna Ývarova, T.Júrgenov atyndaǵy Qazaq Ulttyq óner akademııasynyń stýdenti, halyqaralyq, respýblıkalyq án baıqaýlarynyń jeńimpazy, oblystyq Metsenattar klýbynyń arnaıy júldesiniń ıegeri.
