Qostanaı oblysynyń 140 kásiporny memlekettik qoldaýǵa ıe boldy
Jyl basynan beri «Damý» kásipkerlikti damytý qory bıznesti jeńildikpen kredıtteý memlekettik baǵdarlamasyn iske asyryp keledi. Osy ýaqytqa deıin jalpy somasy 24 mlrd teńgege paıyzdyq mólsherlemeni sýbsıdııalaý arqyly 140 kásiporynǵa qarjylaı qoldaý kórsetilgen. Buǵan qosa qor kepildigin 3,5 mlrd teńgege 104 kásipker ıelendi.
«Pandemııa bastalǵaly QR Úkimeti shaǵyn jáne orta bıznesti qoldaý baǵdarlamasyna birqatar mańyzdy ózgeris engizdi. Sonyń ishinde nesıeniń paıyzdyq mólsherlemesi 6% jyldyq mólsherlememen beriletin boldy. Kásipker nesıe boıynsha 6% jyldyq mólsherlemeni tóleıdi, qalǵan somany «Damý» qory sýbsıdııalaıdy. Qazirgi ýaqytta qor saýdaǵa salynǵan ınvestıtsııalardy qospaǵanda, ekonomıkanyń barlyq salalaryndaǵy kásiporyndardyń qyzmetin qoldap otyr. Bul sharalar pandemııaǵa baılanysty daǵdarys kezeńinde bıznesti qoldaý úshin qabyldandy», - dep atap ótti «Damý» Qory aımaqtyq fılıalynyń klıenttermen jumys boıynsha bas menedjeri Elena Matveeva.
Jeńildetilgen nesıe alǵan Qostanaı oblysynyń kompanııalary arasynda arnaıy kıim jáne jeke qorǵanys quraldaryn óndiretin «Azýrıt» kompanııasy, etten jartylaı fabrıkattar daıyndaıtyn «Terra Meat» jáne «DOGMA» veterınarlyq klınıkasy bar. Kásiporyndar syıaqy mólsherlemesiniń bir bóligin sýbsıdııalaý sheńberinde ónim óndirý kólemin jáne qyzmetter aýqymyn ulǵaıtýǵa múmkindik beretin jabdyq satyp aldy.
Et ónimderin óndiretin «Terra Meat» kompanııasy óndiriletin ónim kólemin arttyrýǵa nıetti. Munyń bári memlekettik qoldaýdyń arqasynda. Búginde kompanııa et ónimderin Qazaqstannyń 14 qalasyna jóneltýde.
«Suranysty sapaly taýarmen qamtamasyz etý úshin banktik nesıe qarajaty boıynsha 40 mln teńgege reseılik, polıak jáne nemis óndirisiniń tońazytqyshtaryn, ıleýge arnalǵan jabdyqtardy satyp alýǵa jumsaldy. Kúnine 3 tonnaǵa deıin jartylaı fabrıkattar óndiremiz», - deıdi «Terra Meat» JShS satylym bóliminiń basshysy Nurlan Amantaev.
Bıznesti memlekettik qoldaýǵa ıe bolǵandardyń biri – «Azýrıt» kásiporny. Kásiporyn 20 jyldan astam ýaqyt boıy arnaıy kıim, jeke qorǵanys quraldary men mektep formasyn shyǵarady.
«Ótken jyly tamyz aıynda biz jabdyqtar alý úshin nesıe aldyq. Bul óndiristiń ósýine yqpal etti. Biz keste tigetin jabdyqtar, 15 arnaıy mashınany, úlgini daıyndaýǵa arnalǵan baǵdarlamany satyp aldyq. Jumysymyz alǵa basyp, úlgini jasaý ońaıyraq boldy. 2018 jyly qolymyzda jabdyqtar joq kezdiń ózinde jylyna 11 myń ónim, al ótken jyly — 15 myń, osy jyldyń basynan bastap kásiporyndarǵa 7 myń kostıým jáne 280 myń betperde tigildi», – deıdi kompanııanyń komertsııalyq dırektory Natalıa Tokýn agenttik tilshisine.
«Damý» qory kásibin jańa bastaǵan bıznesmender men startaperlerge nesıe somasynyń 85%-na deıin kepildik beredi. Olardyń ishinde jas kásipker Maksım Paderın de bar. Ol jeńildetilgen nesıege qol jetkizdi. Maksım ashqan «DOGMA» veterınarlyq klınıkasy ózin janýarlarǵa kásibı jáne bilikti kómek kórsetetin mekeme retinde kórsetti. Klınıkaǵa zamanaýı ÝDZ-dıagnostıka apparaty ákelindi. Bul skaner Qostanaıdyń veterınarlyq ÝDZ naryǵynda joq. Kásipker jeńildetilgen nesıe alý máselesi boıynsha «Damý» Qoryna júgingen. Ekinshi deńgeıdegi bank jobany qoldap, 8 900 000 teńge kóleminde nesıe berdi.
«Biz 5 aı buryn ashyldyq. Qolymyzda azdaǵan qarajatymyz boldy. Biraq iri jabdyqty satyp alýǵa qarajat bolǵan joq. Biz «Damý» Qorynyń memlekettik qoldaý baǵdarlamasy týraly estip, nesıe alý úshin bankke ótinish berdik. Bank ótinishimizdi maquldady. Qor bizge kepildik usyndy, odan soń bankten nesıemizdi aldyq. Birden ÝDZ jabdyǵyna tapsyrys berdik, jaqynda qolymyzǵa alamyz», – deıdi klınıka basshysy Maksım Paderın.
