Qostanaı oblysynda zeınetaqynyń ortasha mólsheri 20 myń teńgege kóbeıdi
Eńbek, áleýmettik qorǵaý jáne kóshi-qon komıtetiniń Qostanaı oblysy boıynsha departamentiniń basshysy Murat Muratbekovtiń aıtýynsha, jyl saıyn turǵyndarǵa 60 myńǵa jýyq memlekettik qyzmet kórsetiledi. Onyń ishinde 12-si respýblıkalyq bıýdjet qarajatynan áleýmettik tólemder men járdemaqylardy taǵaıyndaýǵa baılanysty jáne múgedektikti belgileý boıynsha 1 qyzmet iske asyrylady. Sonymen qatar, 2014 jyldan bastap departament múgedektigi bar adamdardy áleýmettik qorǵaý máseleleri boıynsha memlekettik baqylaýdy júzege asyrady.
«Memleket basshysynyń tapsyrmasyna sáıkes, 2018 jyldyń 1 shildesinen bastap bazalyq zeınetaqy tólemin taǵaıyndaý tetiginiń ózgerýine baılanysty, barlyq zeınetker úshin bazalyq zeınetaqyny qaıta esepteý júrgizildi. Nátıjesinde oblys zeınetkerleriniń 58 paıyzy qosymsha qarjylaı kómekke ıe boldy. Atap aıtsaq, zeınetaqy mólsheri 15 myń teńgeden 28 myń teńgege deıin artty. Qaıta esepteý kezinde zeınetkerlerdiń aqshasy azaıǵan joq. Taǵy bir aıtarymyz, búginde oblysta eń tómengi zeınetaqy 52 myń teńge bolsa, zeınetaqynyń ortasha mólsheri byltyrǵymen salystyrǵanda 20 myń teńgege kóbeıdi, ıaǵnı ol 87 myń teńgeni qurady», - deıdi Murat Muratbekov.
Ótken jyldyń shilde aıynan bastap óńirde birinshi toptaǵy múgedekterge kútim jasaıtyn tulǵalarǵa jańa járdemaqy engizildi. Barlyǵy 700-ge jýyq kútýshi aı saıyn 31 183 teńge járdemaqy alady.
«Memleket óziniń barlyq áleýmettik mindettemelerin tolyq kólemde oryndap keledi. Tek Qostanaı oblysy boıynsha ótken jyly 142 mlrd teńgeden astam somaǵa zeınetaqy men járdemaqy tólendi», - deıdi departament basshysy. «Oblysta bıyl 28 myń múgedek adam tirkeldi. 2017 jylmen salystyrǵanda múgedekter sany 182 adamǵa kóbeıgen. Sonymen birge, halyqtyń áleýmettik osal toptary úshin ǵımarattar men nysandarǵa qoljetimdilikti qamtamasyz etý basty baqylaýda. Ótken jyly jospardan tys 74 tekserý júrgizdik, 150-ge jýyq tártip buzýshylyq anyqtaldy».
Júrgizilgen tekserýlerdiń nátıjeleri boıynsha 32 sýbektige tártip buzýshylyqtardy joıý týraly nusqama jiberildi, jalpy somasy 4266 myń teńgege 20 ákimshilik aıyppul salynǵan.