Qostanaı oblysynda geologııalyq zertteý jumystaryna arnalǵan eń iri keshen ashyldy
Jańa geologııalyq keshen jeke ınvestıtsııalar esebinen salyndy. Onyń quny 320 mln teńge. Qazaqstandaǵy geologııalyq barlaýdy odan ári damytý úshin atalǵan keshenniń mańyzy zor. Bul baǵytty jetildirý kerektigine Memleket basshysy Qasym-Jomart Toqaev ta birneshe ret basa nazar aýdardy. Buryn synamalar óndiristik bazalarda saqtalatyn. Endi ol materıaldar jańa qoımaǵa ornalastyrylady jáne osy jerde alǵashqy zertteýler júrgiziledi.
«Kompanııa stanoktardyń sanyn 10-ǵa deıin ulǵaıtýdy jáne jyl saıyn shamamen 100-120 myń qýma metr burǵylaýdy josparlap otyr. Búgingi tańda biz áýeden beınege túsirý, drondardy paıdalana otyryp, magnıttik barlaý júrgizý sııaqty barlyq jumystardy oryndaımyz. Bul jumystardyń barlyǵyn óz kúshimizben jasaımyz. Bizde eki óndiristik baza bar. Olar - Rýdnyı jáne Hromtaýda. Kompanııa aktıvinde 40-tan astam geologııalyq barlaý ýchaskeleri bar. Olar Qostanaı jáne Aqtóbe oblystarynda ornalasqan. Kompanııa qamtý aımaqtarynyń geografııasyn keńeıtýde jáne Qazaqstannyń barlyq aýmaǵynda jumys isteýdi josparlap otyr», - dep atap ótti ERG Exploration Bas dırektory Azamat Shalabaev.
Saltanatty shara barysynda QR Indýstrııa jáne ınfraqurylymdyq damý mınıstrligine qarasty Geologııa komıtetiniń tóraǵasy Erlan Aqbarov jańa nysannyń ashylýy – elimizdegi geologııalyq barlaý salasyn damytýǵa serpin beretinin atap ótti.
«Bul geologııalyq habtyń qurylysy men onyń iske qosylýy - salanyń damýyna serpin beredi. Mundaı hab alǵash ret jeke ınvestıtsııalar esebinen salyndy. Ol respýblıkada osyndaı formatta jumys isteıtin jalǵyz keshen. Astanada 300 myń qýma metr synama qoımasyn salý josparlanǵan. Jumystardy jobalaý júrip jatyr. Ol materıaldardy saqtaýǵa arnalǵan úlken qor bolady», - dep toqtaldy Erlan Aqbarov.
Eýrazııalyq Top Bas dırektorynyń jobalar jáne damý jónindegi orynbasary Ardaq Nurazhanov kompanııa osydan eki jyl buryn geologııalyq barlaý salasyndaǵy resýrstardy damytý týraly sheshim qabyldaǵanyn atap ótti. Onyń nátıjeleriniń biri – osy qoıma.
«Jańa qondyrǵylardyń arqasynda biz óndiris qajettiligi men tizbegin tolyq qamdaımyz dep senimmen aıtýǵa bolady. Bizdiń jobalaý, izdeý-barlaý, geofızıka, burǵylaý baǵyttary boıynsha óz resýrstarymyz ben burǵylaý stanoktarymyz bar. Aqparattardy óńdeý jáne resýrstar týraly esepterdi daıyndaý men qorlardy balansqa qoıýǵa arnalǵan eń zamanaýı quraldar da óndiriste qoldanylady. Sońǵy eki jylda geologııalyq barlaýǵa orasan zor ınvestıtsııalar salyndy. Ótken jyly geologııalyq barlaýǵa shamamen 9-10 mln dollar, bıyl 20 mln dollardan astam qarajat baǵyttaldy. 2024 jyly bul salaǵa shamamen 40 mln dollar ınvestıtsııa salý josparlanýda», - dep atap ótti ol.
Sonymen qatar, kompanııa derekterdi tsıfrlandyrý baǵytynda da úlken is atqaryp jatyr.
«Biz sońǵy aılarda seriktesterimizben zamanaýı «acQuire» júıesin engizdik. Ol dalalyq jumystardan bastap, synamany daıyndaýǵa deıingi aralyqtaǵy jumystar týraly derekterdi bir júıege biriktiredi. Sondaı-aq, qazir eski qorlardy, buryn bolǵan esepterdi tsıfrlandyrý jumystary da júrip jatyr. Bul jańa ken oryndaryn ashýǵa kómektesedi», - dedi Ardaq Nurazhanov.
ERG GeoHub shamamen 100 myń qýma metr synamany saqtaýǵa qaýqarly. Keshende synamalardy kesýge arnalǵan bólme bar. Onda adamnyń tikeleı qatysýyn qajet etpeıtin jáne qorshaǵan ortaǵa zııandy áseri az joǵary jyldamdyqty zamanaýı keskish stanoktar qoıylǵan. Al qujattarmen jumys isteýge arnalǵan negizgi bólmede avtomattandyrylǵan qujattama ústelderi ornatylǵan. Geologterdiń jumys aımaǵy da dál osy jerde ornalasqan.
«Keshenniń qujattarmen jumys isteýge arnalǵan bóliginde geologtar synama materıalynyń barlyq sıpattamasyn jasap, fotoqujattardy rásimdeıdi. Sondaı-aq, zerthanaǵa jiberý úshin synama materıalyn kesetin aımaq bar. Munda sóreler, qujattamalyq ústelderdiń barylyǵy jańa tehnologııamen jabdyqtalǵan. Bólimde 14 geolog vahtalyq negizde jumys isteıdi. ERG-de bul geologııalyq barlaýdyń jańa baǵyty. Jyl saıyn óndirý kólemi artyp keledi jáne synamalardy saqtaý úshin osyndaı qoımalar qajet», - deıdi «ERG Exploration» JShS dalalyq jumystar basshysynyń mindetin atqarýshy Dáýren Tynynbaev.
Mundaǵy jumys júıeli jolǵa qoıylǵan. Birinshi kezekte burǵylaý ýchaskelerinen alynǵan negizgi materıal Rýdnyı qalasyna jetkiziledi. Keıin qujattama bóliminde onyń sıpattamasy týraly aqparat alynady. Sodan soń synama materıal eki bólikke kesiledi. Onyń biri zerthanaǵa jiberiledi, al ekinshisi atalǵan qoımada qalady.
Spıkerlerdiń aıtýynsha, aldaǵy aılarda Hromtaýda árqaısysy 50 myń qýma metr qýatqa ıe osyndaı taǵy eki qoıma iske qosylady.
