Qostanaı oblysynda dinı nysandardyń jumysyna ruqsat berildi

QOSTANAI.QazAqparat – Búgin oblys ákimi Arhımed Muhambetov óńirde koronavırýstyń taralýyna jol bermeý boıynsha jedel shtabtyń otyrysyn ótkizdi, dep habarlaıdy QazAqparat oblys ákiminiń baspasóz qyzmetine silteme jasap.

Óńirlik jedel shtab karantın sharalaryn jeńildetý týraly usynystardy talqylady. Nátıjesinde oblysta dinı obektilerdiń (meshitter, shirkeýler, soborlar, sınagogalar jáne t.b.) qyzmetine ruqsat etildi. Alaıda dinı nysandarda ujymdyq is-sharalar ótkizýge tyıym salyndy. Oblys ákimi Arhımed Muhambetov Din isteri basqarmasyna dinı nysandarda sanıtarlyq talaptardyń saqtalýyn qamtamasyz etýdi tapsyrdy.

Budan bólek, oblystyń jedel shtaby qabyldaǵan shekteýler 2021 jylǵy 6 qańtarǵa deıin jalǵasady. Atap aıtqanda, otbasylyq, ujymdyq, eske alý is-sharalaryn (banketter, úılený toılary, mereıtoılar, eske alý), ótkizýge tyıym salynǵan. Sondaı-aq monıtorıng toptary jalǵa beriletin úı-jaılardy tekseredi.

Qoǵamdyq tamaqtaný obektileri jeksenbi kúnderi tek «jetkizý» qaǵıdatymen jumys isteıdi.