Qostanaı oblysynda aqyn Aqylbek Shaıahmettiń 70 jasyna oraı mereıtoılyq sharalar ótti
Jetpiske tolyp, Qostanaı oblysynyń qurmetti azamaty atanǵan qalamgerge el-jurty laıyqty qurmet kórsetti.
Lev Tolstoı atyndaǵy oblystyq kitaphanada qalamgerdiń shyǵarmashylyǵy týraly jan-jaqty sóz qozǵalyp, jaqynda jaryq kórgen poezııalyq «Kúzgi kóńil» jáne prozalyq «Ońashadaǵy oqshaý oılar» atty kitaptarynyń tusaýkeseri ótti.
Qostanaıdaǵy Ahmet Baıtursynuly atyndaǵy óńirlik ýnıversıtetinde ótken qalamgerdiń ǵalymdyǵyna arnalǵan halyqaralyq ǵylymı-tájirıbelik konferentsııaǵa Qazaqstannyń birneshe óńiri men Reseı, Qyrǵyzstan, Tájikstan, Ázerbaıjan elderiniń aqyndary men ǵalymdary qatysty.
Aqylbek Shaıahmet kezinde akademık Rymǵalı Nurǵalıdyń jetekshiligimen «Aqyndyq pen sheshendik ónerdiń tıpologııalyq sabaqtastyǵy (Qostanaı óńiri mysalynda)» degen taqyrypta kandıdattyq dıssertatsııa qorǵap, Qostanaı óńirinde týyp-ósken 30-dan astam bı-sheshenniń ómiri men murasyn zerttegen.
Almatydaǵy Ahmet Baıtursynuly atyndaǵy ǵylymı-zertteý ınstıtýtynyń grammatıka bóliminiń meńgerýshisi, fılologııa ǵylymdarynyń doktory Orynaı Jubaeva ǵalymnyń alashtanýǵa, ataqty lıngvıst Eldes Omarulynyń murasyn tanytýǵa qosqan úlesi týraly basa aıtty.
Aqynnyń atajurty Qarabalyq aýdanynda, jýrnalıstik qyzmetin bastaǵan Áýlıekól aýdanynda jáne kindik qany tamǵan Jitiqara aýdanynda şyǵarmashylyq keshteri ótti.
Oblys ortalyǵyndaǵy qazaq drama teatrynda dramatýrgtiń «Ókinish» atty spektakli qoıylsa, Ybyraı Altynsarınnyń memorıaldyq mýzeıinde «Ybyraıdyń ósıeti» dep atalǵan pesadan úzindi kórsetilip, qalamger jerilikti mádenıet qyzmetkerlerimen kezdesti.
Qostanaıdaǵy myń oryndyq «Jastar saraıynda» shyǵarmashylyq kesh ótti. Qalamgerdi eldiń ár óńirinen belgili qoǵam qaıratkerleri quttyqtaı keldi. Ádebıet pen mádenıet keshi óleń-jyrmen órnektelip, áýen-sazben ásemdeldi. Kireberiste aqyn shyǵarmashylyǵynan syr shertetin kitap kórmesi uıymdastyryldy.
Keshtiń betasharynda Qostanaı oblysy ákiminiń orynbasary Arman Ábenov Aqylbek Shaıahmetke QR Prezıdenti Qasym-Jomart Toqaevtyń quttyqtaý hatyn oqyp berdi.
«Qurmetti Aqylbek Qojauly, sizdi mereıtoıyńyzben quttyqtaımyn! Áriptesterińiz ózińizdi búgingi zamanymyzdyń kókeıkesti máselelerin kóterip, qoǵam damýyna ún qosyp júrgen qarymdy qalamger retinde jaqsy biledi. Týyp-ósken óńirińizde óner men mádenıettiń keń qanat jaıýyna, ana tilimizdiń mártebesiniń bıikteýine jan-jaqty atsalysyp júrsiz. Qostanaı memlekettik ýnıversıtetinde qyzmet jasap, jýrnalıst bolýǵa talpynǵan jastardyń bilikti mamandyq ıesi atanýyna úles qostyńyz. Eldiń birligin, Táýelsizdiktiń tarıhı mańyzyn, halyqtar dostyǵyn, adamzat qundylyǵyn arqaý etken óleńderińiz jyrsúıer qaýymnyń oń baǵasyn alyp otyr. Aldaǵy ýaqytta da tartymdy týyndylaryńyzdy usynyp, el-jurttyń qurmetine bólene berýińizge tilektespin! Sizge zor densaýlyq, otbasyńyzǵa bereke tileımin!» — delingen Memleket basshysynyń sózinde.
Arman Tarǵynuly aımaq basshysy Arhımed Muhambetovtiń alǵyshatyn, yqylas gúlin tabystap, ıyǵyna shapan japty. Mereıtoı ıesine QR Parlamenti Senatynyń tóraǵasy Máýlen Áshimbaevtyń lebiz haty da tapsyryldy.
Keshke arnaıy kelgen QR Jazýshylar odaǵy basqarmasynyń tóraǵasy, Memlekettik syılyqtyń ıegeri, aqyn Ulyqbek Esdáýlet, halyqaralyq «Alash» syılyǵynyń laýreaty, aqyn Qasymhan Begmanov, belgili aqyn, aýdarmashy Ábjan Ábiltaı, Májilistiń eks-depýtaty, Qostanaı oblysynyń qurmetti azamaty Serikbaı Bısetaev jáne basqalary óz lebizderin bildirdi.
Ulyqbek Esdáýlet Aqylbek Qojaulynyń shyǵarmashylyq keshin respýblıkalyq deńgeıde ótkizýge atsalysýǵa daıyn ekenin jetkizdi. Almaty oblysynyń ákimi Amandyq Batalovtyń quttyqtaýy men syı-sııapatyn ala kelgen meımandar – belgili qaıratker Serik Muqanov pen Almaty oblysy ákimdigi ishki saıasat basqarmasynyń bastyǵy Rahmet Esdáýletov da aǵynan jaryla tilek aıtty. Osy keshtiń aldynda ǵana Taldyqorǵandaǵy Bıken Rımova atyndaǵy qazaq drama taetrynda A.Shaıahmettiń «Shoqannyń sheri» atty pesasynyń premerasy ótti.
Ýkraınadaǵy qazaq dıasporasy atynan Altynbek Mustapaevtyń, Ázerbaıjannan Mahmut Qashqarı atyndaǵy halyqaralyq qordyń ókili, belgili aqyn Ibrahım Ilıaslynyń qutyqtaýlary oqyldy.
Іzdeımin dep tirliktiń basqa amalyn,
Baqqan joqpyn eshkimniń qas-qabaǵyn.
Bettemedim tórine Alataýdyń,
Qyzyqpadym tórine Astananyń, – dep tolǵanǵan aqyn Alash arystary týraly birneshe pesa, derekti hıkaıa jazǵan bolatyn. Ult ustazy Ahmet Baıtursynulyna arnalǵan, aqyn sózine jazylǵan kompozıtor Qalıbek Deripsaldınniń «Aǵa týraly ánin» jınalǵandar súısine tyńdady.
Óńirge belgili ónerpazdar aqynnyń sózine jazylǵan kópshilikke tanymal «Qostanaı», «Aqjoltaı», «Kóktemgi qar» sekildi ánder men termelerdi oryndady.
Osy ýaqytqa deıin irili-usaqty elý kitap shyǵarǵan qalamgerdiń mektep jasyna deıingi balalarǵa arnalǵan onnan astam sýretti kitapshasy bıylǵy jyly balalar ádebıeti jylyna oraı Nur-Sultan qalasyndaǵy «Bilim Media Group» kompanııasy jaryqqa shyǵardy. Kompanııa ókili Meırambaı Nursáýle bul kitaptardy da kórmede kórsetti. Keleshekte taǵy da osyndaı kitaptar shyǵarýdy josparlap otyrǵanyn aıtty.
Qalamger toıy onyń týǵan jeri Jitiqara qalasynda dúrkirep ótti, Aqyn qonaqtaryna arnaıy kıiz úı tigilip, ol bilim alǵan Musa Shojanov atyndaǵy qazaq mektebinde ustazdarmen jáne shákirttermen kezdesý bolsa, mádenıet úıinde aqyn pesalarynan úzindiler kórsetilip, onyń sózine jazylǵan ánder oryndaldy. Aýdan ákimi Nurjan Ótegenov aýdannyń qurmetti azamaty atanǵan aqynǵa shapan jaýyp, at mingizdi.
Aqyn toıy áli de jalǵasady. Ulttyq akademııalyq kitaphana 22 maýsymda Aqylbek Shaıahmetpen onlaın kezdesý ótkizýdi josparlap otyr.
Eske sala keteıik, budan buryn aqyn Aqylbek Shaıahmettiń QazAqparattyń qonaǵy retinde Táýelsizdiktiń jerimizdi, sýymyzdy, jelbiregen týymyzdy bergenin aıtqanyn jazǵan bolatynbyz.
