Qostanaı oblysy turǵyndarynyń zeınetaqy qory 329,8 mıllıard teńgege jetti
Kezdesý barysynda oblys halqynyń jınaqtaýshy zeınetaqy júıesine qatysý deńgeıi, olardyń qarjylyq saýattylyǵyn arttyrý jáne zeınetaqy júıesin jańǵyrtý máseleleri jan-jaqty talqylandy. Belgili bolǵandaı, Qostanaı oblysynyń 512 myń turǵyny ekonomıkalyq turǵyda belsendi. 2017 jyl basynan bergi málimet boıynsha, 505 adamnyń BJZQ-da mindetti zeınetaqy shoty bar. Búginde osy shottardaǵy qarajat kólemi 329,8 mıllıard teńgege jetti.
«Elimizde bıylǵy 9 aıda 10 mıllıonnan astam jeke shot ashylǵan. Sonyń ishinde 9,8 mıllıon zeınetaqy shotynda 7,5 trıllıon teńge qarajat jınaqtaldy. Qazirgi ýaqytta elimizdiń ekonomıkasyn damytý baǵytynda zeınetaqy qorynyń strategııalyq yqpaly kúsheıýde. Sondyqtan zeınetaqy qorynyń basqarý júıesine qatysty salymshylar tarapynan jıi saýal týyndaıdy. Sol sebepti de sizderdiń óńirlerińizge kelip otyrmyz», - dedi «Biryńǵaı zeınetaqy jınaqtaýshy qory» AQ basqarma tóraǵasy orynbasary Sáýle Egeýbaeva.
Onyń sózine súıensek, Qostanaı oblysy salymshylarynyń zeınetaqy qoryndaǵy qarajattyń ortasha kórsetkishi 671 myń teńgeni quraıdy. Oblystaǵy 294 mekeme-kásiporyn óz qyzmetkerlerine mindetti kásiptik zeınetaqy jarnasyn aýdaryp otyrady.
Kezdesý qorytyndysynda «Biryńǵaı jınaqtaýshy zeınetaqy qory» AQ men oblys ákimdigi arasyndaǵy ózara is-qımyl jóninde yntymaqtastyq memorandýmyna qol qoıyldy.
«Zeınetaqy júıesin jańǵyrtý barysy jóninde turǵyndarǵa júıeli túsindirý qajet. Ásirese, áıelderdiń zeınet jasynyń ulǵaıýyna baılanysty saýaldar kóp. Elimizdegi zeınetaqy qorynyń ahýaly jóninde ashyq baıandadyńyzdar. Bul baǵytta ákimdiktarapynan turǵyndarǵa túsinik jumystaryn belsendi túrde júrgizemiz», - dedi oblys ákiminiń orynbasary Marat Júndibaev.
Búginge deıin BJZQ ókilderimen elimizdiń on eki aımaǵynda memorandým jasaqtalǵan. Aıta keteıik, «Biryńǵaı jınaqtaýshy zeınetaqy qory» AQ 2013 jyly qurylǵan. 2016 jyldan bastap zeınetaqy aktıvterin basqarýdy jetildirý jóninde usynymdar jasaý quzireti Prezıdent basshylyq etetin Ulttyq qordy basqarý keńesine berildi.