Qostanaı oblysy bıyl koronavırýspen qalaı kúresti
Іndetpen kúres: medıtsınalyq nysandardyń daıyndyǵy
Qostanaı oblysynda 489 densaýlyq saqtaý nysany jumys isteıdi. Onyń ishinde ambýlatorııalyq-emhanalyq uıymdar – 26, statsıonarlar – 29, dıspanser, dárigerlik ambýlatorııalar – 41, FAP – 72, medıtsınalyq pýnkt – 329. Mine, atalmysh medıtsınalyq nysandar pandemııa jaǵdaıynda tolyq kúshinde jumys istedi. Oblystyq densaýlyq saqtaý basqarmasynyń basshysy Vıacheslav Dýdnık aıtqandaı, pandemııa úlken salmaq túsirip, medıtsına salasynyń daıyndyǵyn bir synady. Deı turǵanmen, óńirdiń aq halattylary koronavırýspen kúrestiń tıimdi sharalaryn qabyldap, túrli tásilderdi meńgerdi.
«Oblysta indettiń aldyn alý maqsatynda 4500 tósek-oryn daıyndaldy. Elimizde COVID-19-dyń alǵashqy deregi tirkelgen kúnnen bastap, biz daıyndyq sharasyn kúsheıttik. Statsıonarlarda 86 myń patsıent emdelse, búginge deıin 25 myń ota jasaldy. Keı kezderi bir kúnde 80 operatsııaǵa deıin ótkizgen kúnder boldy. Koronavırýstyń alǵashqy tolqynynda 100200 ana bosandy. Emhanalar 3 mln astam adamdy qabyldap, 3 myń patsıentke 14 myń qan komponentteri quıyldy», - deıdi basqarma basshysy.
Koronavırýs jedel járdem qyzmetin de biraz áýrege salǵany anyq. Bıyl jedel járdem shaqyrtýlarynyń rekordtyq kórsetkishi tirkelgen. Jedel kómek 288 myń adamǵa jetken, bul kúnine orta eseppen 800-ge teń. Medıtsınalyq avıatsııamen 220 patsıent tasymaldandy, onyń 60-da ushaq paıdalanyldy.
Kadr tapshylyǵy joq
Memlekettik densaýlyq saqtaý sektorynda 15 myń adam jumys isteıdi desek, onyń 2 myńy – dáriger, 6 myńy – orta medıtsınalyq bilimi bar qyzmetkerler. 2020 jyldyń qańtar aıynan beri aımaqqa syrt oblystardan dárigerlerdi tartý jumystaryna basymdyq berildi. Tamyz aıynan beri Qostanaıǵa 186 dáriger (onyń ishinde 160 medıtsınalyq JOO túlekteri jáne 26 tájirıbeli dáriger) keldi. Onyń ishindegi 19 jas maman jergilikti bıýdjet esebinen qosymsha bilim alady.
«Oblysqa jumys isteýge kelgen mamandarǵa áleýmettik qoldaý sharalary kórsetiledi. Bıyldan bastap qalaǵa kelgen dárigerlerge kótermeaqy tólemderi qarastyrylǵan. Barlyǵy 34 dáriger 14,7 mln teńge qarjylaı kómek aldy. «Dıplommen aýylǵa» baǵdarlamasy aıasynda aýyldardaǵy 310 medıtsına qyzmetkeri 85 mln teńgege kótermeaqyǵa ıe boldy,185 medıtsına qyzmetkeri turǵyn úımen qamtamasyz etildi. Syrttan kelgen dárigerlerge áleýmettik qoldaý sharalary retinde Qazaqstandyq ıpotekalyq kompanııasy arqyly turǵyn úı beriledi. Osyǵan deıin 54 páterdiń kilti tapsyryldy, kelesi jyldyń basynda taǵy 100 dáriger páter kiltin alady», - dep túsindirdi V.Dýdnık.
Qostanaıda jas mamandardyń tájirıbe alýyna jergilikti medıtsınalyq kolledji aıtarlyqtaı múmkindik jasap otyr. Munda 5 medıtsınalyq mamandyq boıynsha bilim beriledi. Oblys ákimdiginiń qoldaýymen stýdentter kontıngenti 2 esege ósti. Buǵan qosa Rýdnyı qalasyndaǵy medkolledjde «Meıirbıke isi» bólimshesi ashyldy. Ol qazir qajetti jabdyqtarmen jaraqtandyrylǵan, ázirge 144 stýdent bilim alady.
Dári-dármek dúmpýi: másele ońtaıly sheshildi
Qazaqstanda koronavırýs juqtyrǵandar kóbeıip, pnevmonııa órshigen tusta dárihanalar aldynda kezek kóbeıdi. Qyzý túsiretin, tumaýǵa qarsy ishetin dári-dármek tapshylyǵy bilindi, jaqyny aýyrǵandar dárini ózge qalalardan da izdep ketti. Resmı derekke súıensek, Qostanaı oblysynyń s tatsıonarlaryna 5,5 mlrd teńgege dári-dármek ákelindi. Onyń ishinde KVI-ge qarsy preparattarǵa qosymsha 988 mln teńge qarjy jumsaldy. Qostanaı oblysynda dári-dármekterdi durys bólinýin QR Sybaılas jemqorlyqqa qarsy is-qımyl agenttigi baqylady. Alık Shpekbaev Qostanaıdaǵy jumys saparynda «SQ-Farmatsııa» JShS operatsııalyq qoımasyna bardy. Qoıma oblystyń emdeý mekemeleri men uıymdarynyń Nur-Sultan qalasyndaǵy habtan dárilik preparattar men medıtsınalyq buıymdardy jedel alý qaǵıdaty boıynsha uıymdastyrylǵan. Statsıonarlyq jáne ambýlatorııalyq emdeýdge qajetti tapsyrystardy qabyldaıdy.
« Ambýlatorııalyq dári-dármekpen qamtamasyz etý sheńberinde medıtsınalyq uıymdardyń ótinimderi boıynsha 6,7 mlrd teńge somasyna dári-dármek kelip tústi. Bul qarjy 2019 jylǵa qaraǵanda 22% - ǵa artyq. 2021 jyly quny 9,4 mlrd teńge bolatyn dári-dármekterge suranys jasaldy. Medıtsınalyq uıymdarda Sovid-19 emdeý hattamasyna kiretin negizgi preparattardyń (antıkoagýlıanttar, antıbıotıkter, glıýkokortıkosteroıdtar) 2 aılyq qory jasaqtaldy. Gýmanıtarlyq kómek jelisi boıynsha 8 700 bir rettik qorǵanys kostıýmderi alyndy», delingen oblystyq densaýlyq saqtaý basqarmasynyń baspasóz habarlamasynda.
Qazaqstanda Reseı Federatsııasy ázirlegen «Spýtnık V» vaktsınasynyń óndiristik jelisi iske qosylǵany belgili. 2021 jyldan bastap turǵyndardy koronavırýstyq ınfektsııaǵa qarsy erikti vaktsınatsııalaý josparlanýda. Osyǵan baılanysty qazir ekpege daıyndyq jumystary bastaldy. 79 dári muzdatqysh jabdyq satyp alynady. Endigi jyldyń basynda vaktsınaǵa qatysatyn adamdardyń kontıngenti anyqtalady. Jalpy, oblysta 2020 jylǵy 3 sáýirden bastap COVID-19 indetiniń 7 myń jaǵdaıy tirkeldi.
Bıýdjet qalaı bólindi?
Oblystyq densaýlyq saqtaý basqarmasynyń basshysy Vıacheslav Dýdnıktiń aıtýynsha, bıyl óńirdiń densa ýlyq saqtaý salasynda 85 mlrd teńge ıgerildi. Onyń ishinde áleýmettik saqtandyrý qory arqyly 67,5 mlrd teńge, respýblıkalyq jáne jergilikti bıýdjetterden 17,5 mlrd teńge jumsaldy.
«Materıaldyq-tehnıkalyq jaraqtandyrý maqsatynda oblystyq bıýdjetten edáýir qarajat bólindi. Qazir 4 iri statsıonar, atap aıtqanda, oblystyq aýrýhana, Qostanaı jáne Rýdnyı qalalyq aýrýhanalary jáne oblystyq ftızıopýlmonologııa ortalyǵy ortalyqtandyrylǵan ottegi jelisine qosylǵan. Bıýdjet qarajatyna joǵary dáldiktegi oksıgenatsııa apparattary satyp alyndy. Jyl basynan beri kompıýterlik tomograftar, sandyq rentgen, ÓJJ apparattarynyń birneshe partııasy jetkizildi. Búginde oblys aýrýhanalarynda 712 ottegi kontsentratory bar. Densaýlyq saqtaý salasyn qoldaý sharalary kelesi jyly da jalǵasady. 2021 jyly densaýlyq saqtaý bıýdjeti 75,2 mlrd. teńgeni quraıdy», - dep túıdi ol.
Qostanaı oblysynyń Densaýlyq saqtaý basqarmasy bilikti medıtsına kadrlaryn daıyndaý úshin tıisti mınıstrlikke jas mamandardy oqytýǵa óńirlik kvotany engizý usynysyn jiberdi. Bilimin shyńdaǵan dárigerler oblysqa qaıtyp kelýge mindetteledi.
